خیبرپختونخوا کی حالت ہماری غلط پالیسیوں کی وجہ سے خراب ہے، علی امین گنڈاپور

?️ 3 دسمبر 2024

پشاور: (سچ خبریں) وزیراعلی خیبرپختونخوا علی امین گنڈا پور نے کہا ہے کہ ہمارے صوبے کی حالت غلط پالیسیوں کی وجہ سے خراب ہے جب کہ پورے پاکستان میں امن قائم کرنے کے لیے اس صوبے کے عوام نے قربانی دی ہیں۔

ڈان نیوز کے مطابق وزیراعلی علی امین گنڈاپور نے نجی یونیورسٹی کے کانوکیشن میں اپنے خطاب کے دوران کہا کہ تعلیمی ادارے ہمارے بچوں کی گرومنگ کریں تاکہ ملک کی ترقی اور والدین کے لیے سکون کا ذریعہ رہیں۔

انہوں نے کہا کہ نوجوان مقابلہ کرنا سیکھیں، ہار نہیں ماننی اور نہ پریشان ہونا ہے بلکہ یہ سوچ بنانی ہوگی کہ ہم نے پڑھنا ہے اور ملک کی ترقی میں کردار ادا کرنا ہے، کسی ایک شکست یا ناکامی سے دکھی ہونا ایمان کی کمزوری ہے، ہمارے قوم میں مقابلہ کرنے کی بہت بڑی صلاحیت ہے۔

وزیراعلیٰ خیبرپختونخوا کا کہنا تھا کہ ہمارے صوبے کی حالت غلط پالیسیوں کی وجہ سے خراب ہے، پورے پاکستان میں امن قائم کرنے کے لیے اس صوبے کے عوام نے قربانی دی ہے جب کہ صوبے میں امن کے قیام کے لیے سیکیورٹی اداروں کے اہلکار قربانیاں دے رہے ہیں۔

انہوں نے اقرا یونیورسٹی کے لیے 3 کروڑ گرانٹ کا اعلان کرتے ہوئے کہا کہ نوجوانوں آپ نے آگے بڑھنا ہے، ڈگریاں انسان کو نہیں بلکہ انسان ڈگریاں بناتا ہے جب کہ والدین اور اساتذہ کی عزت سے تعلیم کے حصول ممکن ہے۔

ان کا کہنا تھا کہ زندگی میں کبھی لڑائی کی شروعات نہیں کی، اپنے اوپر ایف آئی آر کو تعلیمی ڈگریاں سمجھ رہا ہوں۔