تحریک انصاف نے دوست ملک کے کہنے پر ہی 15 اکتوبر کا احتجاج ملتوی کی

18 اکتوبر 2024

لاہور: (سچ خبریں) سلمان اکرم راجہ نے انکشاف کیا ہے کہ تحریک انصاف نے دوست ملک کے کہنے پر ہی 15 اکتوبر کا احتجاج ملتوی کیا۔ تفصیلات کے مطابق سماء نیوز سے گفتگو کرتے ہوئے پاکستان تحریک انصاف کے سیکریٹری جنرل سلمان اکرم راجہ نے پی ٹی آئی کے 15 اکتوبر کے احتجاج کو ختم کرنے سے متعلق اہم انکشاف کیا۔

انہوں نے بتایا کہ ہم پاکستان کی اصل حکومت ہیں،عوام کی آواز ہیں، 15 اکتوبر کے کا احتجاج ملتوی کرنے کے لیے دوست ممالک جنہوں نے شنگھائی تعاون تنظیم کے اجلاس میں شرکت کرنا تھی، ان ممالک کے سفارت خانوں نے درخواست کی تھی جس کے بعد احتجاج ملتوی کیا گیا۔

سلمان اکرم راجہ نے مزید کہا کہ پی ٹی آئی آئینی ترمیمی پیکج کیلئے ووٹ نہیں کرے گی، جسٹس منصور علی شاہ کا حق ہے کہ انہیں چیف جسٹس بنایا جائے اور اگر اس سے پہلے یہ آئینی ترمیم پیکج ہوجاتا ہے تو پھر یہ بات واضع ہوجائے گی کہ ان کو روکنا ہے، اور یہ ایک مکروہ بات ہوگی۔

سلمان اکرم راجہ نے کہا کہ 5 رکنی آئینی بنچ کی تجویز ٹھیک ہے، اس وقت یہ ہونا چاہیےکہ آئین کے مطابق سینئر ترین جج کو چیف جسٹس ہونا چاہیے، آئینی بنچ کی تجویز بہت بہتر تجویز ہے، چاہتے ہیں کہ آئینی ترمیم کو 26 اکتوبر کے بعد نافذ العمل کیا جائے۔

اس سے قبل جمعرات کے روز میڈیا سے گفتگو کرتے ہوئے تحریک انصاف کے سیکرٹری جنرل نے آئینی ترامیم سے متعلق اپنے ردعمل میں کہا کہ مولانا فضل الرحمان نے جو ثابت قدمی دکھائی ہے یہ انشاءاللہ قائم رہے گی، مزاحمت کی جتنی ضرورت آج ہے کبھی نہیں تھی کیونکہ ملک میں آگے تباہی نظر آتی ہے۔