اردو کا شمار دنیا کی بڑی زبانوں میں ہوتا ہے: فودا چوہدری

?️ 11 دسمبر 2021

کراچی(سچ خبریں) وفاقی وزیر اطلاعات فواد چوہدری کا کہنا ہے کہ اردو کا شمار دنیا کی بڑی زبانوں میں ہوتا ہے اردو سب سے زیادہ بولی جانے والی زبانوں میں شامل ہے، ہم چاہتے ہیں کہ نئے رائٹرز اور شاعر ابھر کر سامنے آئیں، نئے لکھنےوالوں کی حوصلہ افزائی کی جانی چاہیے۔

تفصیلات کے مطابق ان خیالات کا اظہار فواد چوہدری نے کراچی آرٹس کونسل میں منعقدہ عالمی اردو کانفرنس میں کیا، فوادچوہدری نے کہا کہ کانفرنس میں شرکت کرنے کو اپنے لئے اعزاز سمجھتا ہوں، آرٹس کونسل داد کی مستحق ہے جو اتنابڑا ادبی میلہ سجارکھاہے۔

فواد چوہدری نے کہا کہ اردو سب سے زیادہ بولی جانے والی زبانوں میں شامل ہے، پوری دنیا میں ہماری زبان پہچانی جاتی ہے جس کی بڑی وجہ اردو لٹریچر پر کیا جانے والا انتھک کام ہے، اسی وجہ سے اردو کا شمار دنیا کی بڑی زبانوں میں ہوتا ہے۔

عالمی اردو کانفرنس سے خطاب میں وفاقی وزیر اطلاعات نے اعلان کیا کہ کراچی میں 25 دسمبر کوقائد اعظم کے یوم پیدائش اور کرسمس کاجشن منائیں گے،قائداعظم کی سالگرہ پرمیلہ منعقد کیا جائے گا، ساتھ ہی فواد چوہدری نے اعلان کیا کہ شعبہ فلم کی بہتری کےلیےکام کر رہے ہیں اور ٹیپو سلطان اوربابر پر فلم بنانے جا رہے ہیں۔

اس موقع پر اپوزیشن کو تنقید کا نشانہ بناتے ہوئے فواد چوہدری نے کہا کہ ن لیگ کےسارے منصوبے کاغذوں میں ہیں، ہم نے ان منصوبوں کو مکمل کیا ہے، کراچی کےعوام جانتے ہیں کہ ن لیگ اورپی پی کتنےپانی میں ہیں؟