آزادکشمیر میں عدم اعتماد کی تحریک ذاتی نہیں، آئینی حق ہے۔ شازیہ مری

?️ 28 اکتوبر 2025

اسلام آباد (سچ خبریں) ترجمان پیپلز پارٹی شازیہ مری کا کہنا ہے کہ آزاد کشمیر میں عدم اعتماد کی تحریک ذاتی نہیں، آئینی حق ہے، آزاد کشمیر کے عوام ایک نمائندہ اور جوابدہ حکومت کے حقدار ہیں۔

اپنے ایک بیان میں انہوں نے کہا کہ پیپلز پارٹی آزاد کشمیر میں جمہوری تبدیلی کیلئے متحد اور کوشاں ہے، پیپلز پارٹی کی طاقت عوام کے اعتماد اور جمہوری مینڈیٹ میں ہے۔ آئینی عمل کو بحران بنانا غیر جمہوری رویہ ہے، پیپلز پارٹی آزاد کشمیر میں استحکام اور شفاف طرزحکمرانی یقینی بنائے گی۔

انہوں نے مزید کہا کہ عوامی خدمت میں ناکام رہنے والوں کو دستبردار ہونا ہوگا، جمہوری قوتوں سے اتحاد وقتی مفاد کا نہیں بلکہ ذمہ داری کا مظہر ہے۔ پیپلز پارٹی کی قیادت نے ہمیشہ ملک میں جمہوریت کا پرچم بلند رکھا، بلاول بھٹو کا وژن پیپلز پارٹی کے ذمہ دارانہ کردار کی رہنمائی کر رہا ہے۔

شازیہ مری نے کہا کہ پیپلز پارٹی کشمیری عوام کے حقوق اور وقار کے دفاع میں ہمیشہ پیش پیش رہے گی۔