ایرانی وزیر خارجہ کا اسحاق ڈار کو فون؛ کیا بات چیت ہوئی؟

?️ 4 اگست 2024

سچ خبریں: وزیر خارجہ اسحاق ڈار اور ایرانی قائم مقام وزیر خارجہ علی باقری کنی کے درمیان ٹیلیفونک بات چیت ہوئی، جس میں ایرانی وزیر خارجہ نے انہیں او آئی سی وزرائے خارجہ کے اجلاس میں شرکت کی دعوت دی۔

ٹیلیفون کال کے دوران، قائم مقام وزیر خارجہ علی باقری کانی نے اسماعیل ہنیہ کی شہادت پر ایران کی قوم اور قیادت کے گہرے دکھ کا اظہار کیا۔

ڈپٹی وزیر اعظم اسحاق ڈار نے کہا کہ پاکستانی عوام بھی ان جذبات میں شریک ہیں اور وزیراعظم شہباز شریف نے غزہ کی صورتحال اور اسماعیل ہنیہ کے وحشیانہ قتل کی سخت ترین الفاظ میں مذمت کی ہے۔

یہ بھی پڑھیں: او آئی سی کے وزرائے خارجہ کا ہنگامی اجلاس طلب

انہوں نے مزید کہا کہ قومی اسمبلی نے بھی اس سنگین فعل کی متفقہ طور پر مذمت کی ہے جو بین الاقوامی قوانین، سفارتی اصولوں اور عالمی رویے کے خلاف ہے۔

ایرانی قائم مقام وزیر خارجہ نے ڈپٹی وزیر اعظم اسحاق ڈار سے درخواست کی کہ وہ اس معاملے پر وزرائے خارجہ کی سطح پر منعقد ہونے والے او آئی سی کے غیر معمولی اجلاس میں شرکت کریں۔

مزید پڑھیں: فلسطین کی تاریخ ہنیہ کے قتل سے ختم نہیں ہوگی؟

یاد رہے کہ یہ اجلاس ایران کی درخواست پر منعقد کیا جا رہا ہے اور جلد متوقع ہے، ڈپٹی وزیر اعظم نے او آئی سی وزرائے خارجہ کے غیر معمولی اجلاس کے مطالبے کی مکمل حمایت کی اور اس بات کی تصدیق کی کہ پاکستان اس اہم اجلاس میں فعال طور پر حصہ لے گا۔