حضرموت اور المہرہ میں پیش رفت پر سعودی عرب کی تشویش، کشیدگی کم کرنے اور مذاکرات کی اپیل

یمن کے جنوب میں کشیدگی میں اضافے کے ساتھ ہی سعودی عرب نے حضرموت اور المہرہ صوبوں میں حالیہ تحرکات پر تشویش کا اظہار کرتے ہوئے ان کے ممکنہ سکیورٹی اور سیاسی نتائج سے خبردار کیا ہے اور فریقین پر ضبط، مکالمے اور حالات کو سابقہ صورتحال میں واپس لانے پر زور دیا ہے۔

میڈیا رپورٹس کے مطابق، سعودی وزارتِ خارجہ نے ایک سرکاری بیان میں کہا ہے کہ جنوبی عبوری کونسل کی جانب سے حضرموت اور المہرہ میں کیے گئے اقدامات یکطرفہ ہیں اور یہ نہ تو یمن کی صدارتی کونسل کی منظوری سے ہوئے ہیں اور نہ ہی عرب اتحاد کی قیادت کے علم میں لائے گئے تھے۔ بیان میں کہا گیا کہ ان اقدامات سے یمنی عوام کے مفادات، جنوبی مسئلے اور عرب اتحاد کی کوششوں کو نقصان پہنچا ہے۔

ریاض نے تمام یمنی قوتوں اور سیاسی دھڑوں کے درمیان تعاون کی اہمیت پر زور دیتے ہوئے مطالبہ کیا ہے کہ ایسے کسی بھی اقدام سے گریز کیا جائے جو امن و استحکام کو کمزور کرے۔ سعودی عرب نے واضح کیا کہ وہ متحدہ عرب امارات کے ساتھ مل کر یمن کی صدارتی کونسل کے سربراہ اور مستعفی حکومت کے ساتھ رابطے میں ہے تاکہ جنوبی یمن میں کشیدگی کو قابو میں رکھا جا سکے، اور یہ مشاورت بدستور جاری ہے۔

بیان میں کہا گیا کہ حضرموت اور المہرہ میں حالات کو پہلے جیسے بنانے کی کوششیں جاری ہیں اور جنوبی یمن کا مسئلہ تاریخی نوعیت کا حامل ہے، جس کا حل صرف تمام متعلقہ فریقوں کے درمیان جامع مکالمے کے ذریعے ہی ممکن ہے۔ سعودی عرب نے ایک بار پھر یمن کی مستعفی حکومت کی حمایت کا اعادہ کرتے ہوئے تمام فریقین سے کشیدگی بڑھانے سے گریز کی اپیل کی ہے۔

سعودی عرب نے اس بات پر بھی زور دیا کہ وہ حضرموت اور المہرہ میں جاری صورتحال سے نمٹنے کے لیے پرامن اور سیاسی حل کی تمام کوششوں کی حمایت کرتا ہے۔

حالیہ دنوں میں جنوبی عبوری کونسل کی افواج نے یمن کے جنوبی علاقوں کے وسیع حصوں پر کنٹرول حاصل کر لیا ہے۔ کونسل کا دعویٰ ہے کہ اس کی فوجی کارروائیوں کا مقصد شدت پسند عناصر کا خاتمہ اور اسمگلنگ کی روک تھام ہے۔ اطلاعات کے مطابق، حضرموت میں کونسل کی افواج نے سیئون شہر پر قبضے کے ساتھ ساتھ سعودی سرحد سے متصل صحرائی علاقوں میں بعض تیل کے میدانوں کا کنٹرول بھی سنبھال لیا ہے۔

اسی طرح عمان کی سرحد سے ملحق المہرہ صوبے میں جنوبی عبوری کونسل نے بعض مقامی رہنماؤں کے اپنے اتحاد میں شامل ہونے کا اعلان کیا ہے۔ حضرموت، جو یمن کا سب سے بڑا صوبہ ہے، وہاں پیش رفت کے نتیجے میں سعودی حمایت یافتہ افواج پسپا ہو کر صوبہ مأرب کی جانب منتقل ہو گئی ہیں۔

ان تبدیلیوں نے جنوبی عبوری کونسل اور سعودی حمایت یافتہ دیگر گروہوں کے درمیان نئے تصادم کے خدشات کو بڑھا دیا ہے، جبکہ ساتھ ہی یہ قیاس آرائیاں بھی زور پکڑ رہی ہیں کہ کونسل جنوبی یمن کی علیحدگی اور 1990 سے قبل موجود سابقہ جنوبی یمنی ریاست کی بحالی کی سمت پیش قدمی کر رہی ہے۔