یورپی ممالک جمہوریت کے نام پر دہشتگروں کی حمایت کرتے ہیں: ترک صدر

🗓️ 3 جون 2022

سچ خبریں:ترک صدر نے شام کے مزید علاقوں میں فوجی آپریشن کو وسعت دینے کی دھمکی دیتے ہوئے کہا کہ یورپی ممالک جمہوریت کے نام پر دہشت گرد تنظیموں کی حمایت کرتے ہیں۔
الجزیرہ چینل کی رپورٹ کے مطابق ترکی کے صدر نے جسٹس اینڈ ڈویلپمنٹ پارٹی کے ارکان کے درمیان تقریر کرتے ہوئے اعلان کیا کہ یورپی ممالک دہشت گرد تنظیموں کی حمایت کرتے ہیں، رپورٹ کے مطابق ترک صدر نے کہا کہ ترکی کی رضامندی کے بغیر سویڈن اور فن لینڈ شمالی بحر اوقیانوس کے معاہدے کی تنظیم میں شامل نہیں ہو سکیں گے۔

انہوں نے کہا کہ یورپی ممالک کو دہشت گرد تنظیموں کی سرگرمیوں اور اقدامات کی مخالفت کرنی چاہیے، ان تنظیموں کے نام تبدیل کرنے سے انہیں کوئی جواز نہیں ملتا، ہم جانتے ہیں کہ کون ان تنظیموں کی حمایت کرتا ہے اور کون نہیں۔

رجب طیب اردگان نے مزید کہا کہ ہم نے سکیورٹی کی صورتحال کو بہتر بنانے کے لیے بہت کچھ خرچ کیا ہے اور ہم ترکی کے اندر اور باہر دہشت گرد تنظیموں کو تباہ کرنے میں کامیاب رہے ہیں، تاہم نیٹو نے دہشت گرد تنظیموں کو تباہ کرنے کے لیے ہماری اتنی مدد نہیں کی بلکہ اس کے برعکس سویڈن نے کردستان ورکرز پارٹی (PKK)کو 350 ملین ڈالر فراہم کیے جس سے انہیں میزائل حاصل کرنے میں مدد ملی۔

اردگان نے کہا کہ یورپی ممالک ایسے پلیٹ فارم ہیں جن کے ذریعے دہشت گرد تنظیمیں اپنی بات پھیلاتی ہیں نیز یورپی ممالک دہشت گرد تنظیموں کے سربراہوں کی میزبانی کرتے ہیں جبکہ جرمنی، ہالینڈ، فن لینڈ اور سویڈن میں دہشت گرد تنظیمیں ان ممالک کی پولیس کے تعاون سے مظاہرے کرتی ہیں۔