چین روس کو کوئی ہتھیار نہ دے:جرمنی

🗓️ 25 فروری 2023

سچ خبریں:جرمن وزیر خارجہ اینالینا بائربوک نے کہا کہ چین کو روس کو کوئی ہتھیار نہیں دینا چاہیے۔

سی این این کی رپورٹ کے مطابق جرمن وزیر خارجہ اینالینا بائربوک نے برسلز میں یورپی یونین کے اجلاس کے بعد کہا کہ میں نے واضح طور پر کہا کہ چین، خاص طور پر سلامتی کونسل کے رکن کی حیثیت سے، عالمی امن کو برقرار رکھنے کا ذمہ دار ہے۔

انہوں نے مزید کہا کہ روس کو ہتھیار نہ دینے کا مطلب یہ ہے کہ چین روس کو دوہرے استعمال کے سامان سمیت کوئی ہتھیار نہ دے، بائربوک نے تاکید کی کہ گزشتہ ہفتے میونخ سکیورٹی کانفرنس کے دوران میں نے چینی وفد سے بھی کہا کہ وہ عالمی امن کو برقرار رکھنے کے ذمہ دار ہیں۔

یاد رہے کہ امریکی وزیر خارجہ انتھونی بلنکن نے بھی سی بی ایس کو بتایا کہ امریکہ کو اس بات پر تشویش ہے کہ چین یوکرین کی جنگ میں روس کو مہلک مدد فراہم کرنے پر غور کر رہا ہے۔

رپورٹ کے مطابق امریکی حکام نے کچھ عرصہ قبل دعویٰ کیا تھا کہ واشنگٹن کا خیال ہے کہ چین یوکرین کے ساتھ جنگ میں استعمال کے لیے روس کو غیر مہلک فوجی امداد فراہم کر سکتا ہے۔

یاد رہے کہ یوکرین پر روس کے حملے کے بعد کے ہفتوں میں، امریکی صدر جو بائیڈن اور امریکی قومی سلامتی کے مشیر جیک سلیوان سمیت اس ملک کے سینئر حکام نے بیجنگ کو خبردار کیا کہ وہ جنگ میں روس کی مادی طور پر حمایت نہ کرے ورنہ اسے برے نتائج کا سامنا کرنا پڑے گا،امریکیوں کا کہنا ہے کہ چین نے اس غیر تحریری اصول پر عمل کیا ہے اور روس کو مہلک ہتھیار فروخت نہیں کیے ہیں۔