ٹرمپ کن بیماریوں میں مبتلا ہیں 

?️ 1 ستمبر 2025

ٹرمپ کن بیماریوں میں مبتلا ہیں

حالیہ دنوں میں سوشل میڈیا پر امریکہ کے  صدر ڈونلڈ ٹرمپ کی موت کی افواہیں بڑے پیمانے پر پھیل گئیں، تاہم یہ محض قیاس آرائیاں ثابت ہوئیں۔ اصل پس منظر اُن کی بڑھتی عمر، کچھ طبی مسائل اور قریبی حلقوں کے بیانات ہیں جنہوں نے ان افواہوں کو تقویت دی۔

امریکی جریدے یواس اے ٹوڈے سے گفتگو میں ٹرمپ کے نائب جی ڈی ونس نے کہا کہ "اگرچہ 79 سالہ ٹرمپ ابھی بھی توانائی سے بھرپور ہیں، لیکن اس عمر میں کبھی بھی کوئی غیر متوقع سانحہ پیش آ سکتا ہے۔اس بیان کے بعد ٹرمپ کی ممکنہ موت کے بارے میں چہ میگوئیاں زور پکڑ گئیں۔

طبی رپورٹس کے مطابق ٹرمپ کو مزمن وریدی ناکافیّت (Chronic Venous Insufficiency) ہے، جس کی وجہ سے ان کے پاؤں میں سوجن رہتی ہے۔ ان کی تصاویر بھی ماضی میں سوشل میڈیا پر وائرل ہو چکی ہیں۔ مزید یہ کہ انہیں کولیسٹرول کی بلند سطح کا مسئلہ بھی ہے اور وہ اٹوروواسٹیٹن نامی دوا لیتے رہے ہیں۔ ان کا وزن زیادہ اور باڈی ماس انڈیکس موٹاپے کی سرحد پر ہے، جس سے دل کے امراض کا خطرہ بڑھ جاتا ہے۔

کچھ رپورٹس میں دعویٰ کیا گیا ہے کہ وہ پروسٹیٹ یا گردوں کے مسائل کے باعث ایک عرصے تک فیناسٹرائیڈ دوا بھی استعمال کرتے رہے، جو عام طور پر بال جھڑنے یا پروسٹیٹ بڑھنے پر دی جاتی ہے۔ اس کے علاوہ اُن کے دل کی شریانوں میں جزوی کلسیفیکیشن (Calcium Deposits) کی نشاندہی بھی ہوئی ہے، جو ہلکی درجے کی قلبی بیماری کی علامت ہے۔

2019 میں ان کا ایک غیر متوقع معائنہ واشنگٹن کے والٹر ریڈ اسپتال میں ہوا، جس نے مزید سوالات کو جنم دیا۔ تاہم وائٹ ہاؤس نے اس وقت وضاحت دی تھی کہ یہ صرف ایک معمول کا طبی چیک اپ تھا۔

مخالفین اکثر ٹرمپ کی ذہنی صحت پر بھی سوال اٹھاتے ہیں، بالخصوص ان کے غیر متوازن رویے اور توجہ مرکوز کرنے میں دشواری کے حوالے سے۔ لیکن کسی سرکاری طبی دستاویز میں ان کی ذہنی بیماری کی تصدیق نہیں کی گئی۔

یاد رہے کہ ٹرمپ کی عمر، ان کے طبی مسائل اور قریبی افراد کے غیر محتاط بیانات نے ان کی موت کی افواہوں کو جنم دیا، لیکن فی الحال وہ زندہ اور سیاسی طور پر سرگرم ہیں۔