ٹرمپ کا سابق مشیر جان بولٹن پر فردِ جرم عائد ہونے پر ردِعمل

ٹرمپ کا سابق مشیر جان بولٹن پر فردِ جرم عائد ہونے پر ردِعمل

امریکی صدر ڈونلڈ ٹرمپ نے اپنے سابق مشیرِ قومی سلامتی جان بولٹن پر فردِ جرم عائد ہونے کے بعد ردِعمل دیتے ہوئے انہیں برا شخص قرار دیا اور کہا کہ وہ اس معاملے سے پہلے لاعلم تھے۔

ٹرمپ نے جمعرات کو وائٹ ہاؤس میں صحافیوں سے گفتگو کرتے ہوئے کہا:میں سمجھتا ہوں کہ وہ ایک بُرا آدمی ہے،  محکمۂ انصاف نے بولٹن پر الزام عائد کیا ہے کہ انہوں نے دفاعی نوعیت کی خفیہ معلومات غیر قانونی طور پر اپنے پاس رکھی تھیں۔

ریاست مریلینڈ کی ایک عدالت میں دائر فردِ جرم کے مطابق، بولٹن پر آٹھ الزامات حساس معلومات منتقل کرنے اور دس الزامات خفیہ ریکارڈ رکھنے کے لگائے گئے ہیں۔

اگر وہ مجرم ثابت ہوئے تو انہیں 10 سال تک قید کی سزا ہو سکتی ہے۔

ذرائع کے مطابق، ایف بی آئی نے رواں سال اگست میں بولٹن کے گھر اور دفتر کی تلاشی لی تھی۔ یہ کارروائی قومی سلامتی کی تحقیقات کا حصہ تھی تاکہ ممکنہ طور پر خفیہ سرکاری کاغذات برآمد کیے جا سکیں۔

بولٹن کے وکیل نے وضاحت کی ہے کہ ان کے مؤکل کے پاس موجود دستاویزات دراصل جارج ڈبلیو بش کے دورِ حکومت سے متعلق ہیں، جب بولٹن اقوامِ متحدہ میں امریکہ کے سفیر کے طور پر خدمات انجام دے رہے تھے۔

میڈیا رپورٹس کے مطابق، بولٹن وہ تیسرے نمایاں ناقد ہیں جن پر ٹرمپ حکومت کے دوران قانونی کارروائی کی جا رہی ہے۔ اس سے قبل جیمز کومی سابق سربراہ ایف بی آئی اور لیٹیشیا جیمز بھی اس فہرست میں شامل ہیں۔

سیاسی مبصرین کا کہنا ہے کہ بولٹن کے خلاف فردِ جرم ٹرمپ انتظامیہ کے اندرونی اختلافات اور طاقت کی کشمکش کی ایک اور جھلک پیش کرتی ہے۔