نیتن یاہو کی قاتل حکومت پر ایک ڈالر بھی خرچ نہیں ہونا چاہیے:امریکی سینیٹر

نیتن یاہو کی قاتل حکومت پر ایک ڈالر بھی خرچ نہیں ہونا چاہیے:امریکی سینیٹر

امریکی سینیٹر برنی سینڈرز نے اسرائیل کی موجودہ حکومت پر شدید تنقید کرتے ہوئے کہا ہے کہ امریکہ کو اب مزید ایک ڈالر بھی بنیامین نیتن یاہو کی نسل پرست اور قاتل حکومت کو نہیں دینا چاہیے۔

سینڈرز نے منگل کی شب اپنے خطاب میں کہا کہ امریکی ٹیکس دہندگان نے اربوں ڈالر اسرائیل کو دیے، جو اب ایک ایسی حکومت کے ہاتھ میں ہیں جو نہ صرف غزہ میں انسانی امداد کو روک رہی ہے بلکہ وہاں قحط جیسے حالات پیدا کر چکی ہے۔

انہوں نے واضح کیا:ہم اس حکومت کی حمایت کیسے جاری رکھ سکتے ہیں، جس نے ہزاروں فلسطینیوں کو قتل کیا اور لاکھوں کو زخمی کیا ہے؟ یہ اخلاقاً، انسانی طور پر اور سیاسی طور پر ناقابل قبول ہے۔

سینڈرز نے کہا کہ امریکی حکومت کا بجٹ کسی ایسی ریاست کی حمایت میں استعمال نہیں ہونا چاہیے جو انسانی حقوق کی اس قدر صریح خلاف ورزی کی مرتکب ہو چکی ہے۔ ان کے بقول، اسرائیلی حملوں میں تقریباً 60 ہزار فلسطینی جاں بحق اور 1 لاکھ 43 ہزار سے زائد زخمی ہو چکے ہیں۔

ان بیانات کا پس منظر وہ بڑھتا ہوا دباؤ ہے جو امریکہ کی اندرونی سیاسی فضا اور عالمی سطح پر، غزہ میں جاری جنگ میں اسرائیل کی حمایت پر سامنے آ رہا ہے۔ مختلف انسانی حقوق کی تنظیمیں، بین الاقوامی ادارے اور کئی امریکی سیاستدان اب ببانگ دہل واشنگٹن سے مطالبہ کر رہے ہیں کہ وہ اسرائیل کی حمایت بند کرے۔

برنی سینڈرز، جو ڈیموکریٹک پارٹی کے ترقی پسند دھڑے سے تعلق رکھتے ہیں، پہلے بھی اسرائیلی پالیسیوں پر نکتہ چینی کرتے رہے ہیں، لیکن یہ تازہ ترین بیانات ان کی اب تک کی سب سے سخت تنقید تصور کی جا رہی ہے۔