محتدہ عرب امارات کی یوکرین بحران کو کم کرنے کی کوشش

?️ 10 اگست 2023

سچ خبریں: جدہ اجلاس کے ذریعے یوکرین کے بحران کو حل کرنے کی سعودی عرب کی بے سود کوشش کے بعد متحدہ عرب امارات کے صدر روس اور یوکرین کے صدور کے درمیان مشترکہ اجلاس کی تیاری کر رہے ہیں۔

الخلیج نیوز ایجنسی کی رپورٹ کے مطابق یورپی سفارتی ذرائع نے اعلان کیا ہے کہ متحدہ عرب امارات کے صدر محمد بن زائد آل نہیان دبئی میں 30 نومبر سے12 دسمبر 2023 تک جاری رہنے والے اقوام متحدہ کے آب و ہوا کے اجلاس میں روسی صدر ولادیمیر پیوٹن اور ان کے یوکرینی ہم منصب ولادیمیر زیلنسکی کے درمیان ملاقات کرانے کا ارادہ رکھتے ہیں۔

یہ بھی پڑھیں: ترکی روس اور یوکرین کے درمیان ثالثی کے لیے تیار

اس رپورٹ کے مطابق بن زائد نے اپنے ارادے کے بارے میں پوپ فرانسس کو بتایا تو انہوں نے اس کا پرتپاک خیرمقدم کیا، اس کے بعد متحدہ عرب امارات کے صدر نے امریکہ کے صدر جو بائیڈن سے بھی اس سلسلہ میں بات کی تو انہوں نے بھی اس منصوبے کا خیرمقدم کیا اور اس بات پر زور دیا کہ وہ اس مقصد کے حصول میں مدد کرنے کے لیے تیار ہیں۔

امریکی محکمہ خارجہ کے ترجمان میتھیو ملر نے بھی دعویٰ کیا ہے کہ یوکرینی فریق روس کے ساتھ بات چیت کے لیے تیار ہے،تاہم پیوٹن اور زیلنسکی کے درمیان کسی بھی ملاقات کا انعقاد یوکرین کے صدر کے فیصلے پر منحصر ہے۔

یاد رہے کہ متحدہ عرب امارات روس اور یوکرین کے درمیان ثالثی کے لیے کوشاں ہے جب کہ سعودی عرب نے روس کی شرکت کے بغیر دنیا کے ممالک اور اداروں کے نمائندوں کی موجودگی میں یوکرین کے بحران کے بارے میں اجلاس منعقد کر کے اپنی قسمت آزمائی ہے۔

مزید پڑھیں:روس اور یوکرین کی جنگ میں روس کی پوزیشن مضبوط: وائٹ ہاؤس

قابل ذکر ہے کہ یوکرین کے بحران کے حوالے سے جدہ میں ہونے والا دو روزہ اجلاس چند روز قبل ایک مبہم اور مختصر بیان جاری کر کے ختم ہو گیا،اس بیان کے مطابق اس ملاقات کے شرکاء نے امن کے حصول کے لیے مشترکہ بنیاد بنانے کے لیے مشاورت جاری رکھنے پر اتفاق کیا۔