سچ خبریں:لبنان کے وزیر اعظم نجیب میقاتی نے کہا کہ کسی نے بھی انتخابات منسوخ کرنے کی بات نہیں کی اور نہ ہی ان کو ملتوی کرنے کا کوئی ارادہ ہے۔
لبنانی البناء اخبارکی رپورٹ کے مطابق لبنان کے وزیر اعظم نجیب میقاتی نے پارلیمنٹ کے اسپیکر نبیہ بری سے کل لبنان کی پارلیمنٹ کی عمارت میں ملاقات کی تاکہ ان کے فرانس کے دورے اور فرانسیسی صدر ایمانوئل میکرون سے ملاقات کی تفصیلات پر تبادلہ خیال کیا جائے۔
نجیب میقاتی نےاس ملاقات کے بعد اعلان کیا کہ انہوں نے حکومت میں اعتماد کے ووٹ کے دوران نبیہ بری کی تمام کوششوں کا شکریہ ادا کیا اور انہیں پیرس کے اپنے دورے کے ماحول سے آگاہ کیا،انھوں نے کہا کہ ہم نے قانون سازی کے سیشن اور ضروری اصلاحات کے لیے پارلیمنٹ کے تجویز کردہ قوانین کے بارے میں بھی بات کی۔
انہوں نے مزید کہا کہ میں نے پارلیمنٹ کے اسپیکر سے پارلیمنٹ کے منظور کردہ قوانین کی تنظیمی دفعات کے بارے میں بھی بات کی کہ ہم 20 سے زائد تنظیمی احکامات کو جلد از جلد منظوری کے لیے وزراء کونسل کو بھیجنے کے لیے تیار ہیں۔
لبنانی وزیر اعظم نے پارلیمانی انتخابات کے انعقاد یا منسوخی میں تاخیر کے بارے میں بعض لوگوں کےدرمیان پائی جانے والی تشویش کا ذکر کرتے ہوئے کہا کہ کسی نے بھی انتخابات منسوخ کرنے کی بات نہیں کی اور نہ ہی ان کو ملتوی کرنے کا کوئی ارادہ ہے،انھوں نے کہا کہ انتخابی قانون کے حوالے سے ہم ایک ایگزیکٹو ہیں اور ہمارا فرض ہے کہ قانون کے مطابق وقت پر پارلیمانی انتخابات کروائیں۔
واضح رہے کہ لبنانی ذرائع نے یہ بھی بتایا کہ گزشتہ ہفتے بجلی کمپنی کو انتباہ کے بعد کہ ایندھن کی قلت کی وجہ سے یہ اس ماہ کے آخر تک بجلی مکمل طور پر منقطع ہو جائے گی ، نجی کمپنی اور مرکزی بینک کے گورنر ریاض سلامہ کے درمیان بجلی کمپنی کو فنڈ دینے کے لیے کالیں کی گئی ہیں۔
رپورٹ کے مطابق ، ریاض سلامہ نے اس مقصد کے لیے 200 ملین ڈالر سے 300 ملین ڈالر پیشگی ادا کرنے کے لیے اپنی تیاری کا اعلان کیا ہے ، بشرطیکہ توانائی اور وزرائے خزانہ وزیر اعظم کے ساتھ فالو اپ کریں۔