عراقی خودمختاری امریکی فوجیوں کے مکمل انخلاء کے بعد ہی ممکن ہے:عراقی پارلیمنٹ ممبر

?️ 5 اکتوبر 2021

عراقی پارلیمنٹ کے ایک رکن نے ایک بیان میں کہا ہے کہ عراق کی خودمختاری کو برقرار رکھنا اس ملک سے امریکی فوجیوں کے مکمل انخلا پر منحصر ہے۔
الفرات نیوزچینل کی رپورٹ کے مطابق عراقی رکن پارلیمنٹ محمد کریم البلداوی نے منگل کو امریکی فوجیوں کے اپنے ملک سے نکلنے کی ضرورت کے بارے میں بات کی، رپورٹ کے مطابق عراقی رکن پارلیمنٹ نے کہاکہ ہماری بنیادی اور سیاسی ترجیح عراق سے امریکی فوجیوں کا انخلا ہے کیونکہ ہم سمجھتے ہیں کہ ہماری خود مختاری کو برقرار رکھنا امریکیوں کے مکمل انخلا پر منحصر ہے۔

انہوں نے مزید کہاکہ عراقی سرزمین پر غیر ملکیوں کی مسلسل موجودگی کو قبضہ سمجھا جاتا ہےنیز یہ عراقی خودمختاری کی خلاف ورزی ہےلہذا ہمیں امید ہے کہ عراق سے امریکی فوجیوں کا انخلاء اگلی حکومت کی ترجیح ہوگی۔

واضح رہے کہ قبل ازیں عراقی رکن پارلیمنٹ حامد الموسوی نے ایک بیان میں کہاکہ امریکہ دہشت گرد گروہ داعش کے عناصر کو استعمال کر کے عراق میں انتشار پیدا کرنے کی کوشش کر رہا ہے۔

انہوں نے کہا کہ یہ پیش گوئی کی جا سکتی ہے کہ واشنگٹن عراقی حکومت پر دباؤ ڈالنے کے لیے داعش کے اوزار استعمال کرے گا جب تک کہ حکومت امریکی فوجیوں کو ملک سے نکالنے کے حکم پر عمل درآمد کرنے پر مجبور نہ ہو جائے۔

اپنی تقریر کے ایک اور حصے میں عراقی رکن پارلیمنٹ نے کہاکہ اس وقت دہشت گرد خاندانوں کے 35000 ارکان شام کے الہول کیمپ میں موجود ہیں جنہیں امریکہ ہتھیارکے طور پر استعمال کرتا ہے۔