بھارت کا روس سے تیل خریدنے پر ٹرمپ کا اظہار مایوسی

بھارت کا روس سے تیل خریدنے پر ٹرمپ کا اظہار مایوسی

امریکی صدر ڈونلڈ ٹرمپ نے بھارت کی جانب سے روس سے تیل کی خریداری جاری رکھنے کے فیصلے پر مایوسی ظاہر کی ہے اور کہا ہے کہ یہ اقدام امریکہ کے لیے غیرمتوقع اور ناپسندیدہ ہے۔

رپورٹ کے مطابق، ٹرمپ نے وائٹ ہاؤس میں صحافیوں سے گفتگو کرتے ہوئے کہا میں واقعی اس بات سے بہت مایوس ہوا ہوں کہ بھارت اتنی بڑی مقدار میں روسی تیل خرید رہا ہے، اور میں نے یہ ناراضی بھارت کو بھی پہنچا دی ہے۔

ٹرمپ نے مزید کہا کہ اسی وجہ سے امریکہ نے بھارتی مصنوعات پر بلند تجارتی ٹیرف عائد کیے ہیں۔ تاہم، انہوں نے اس کے باوجود روس، بھارت اور چین کے لیے ایک طویل اور خوشحال مستقبل کی خواہش ظاہر کی اور اعتراف کیا کہ امریکہ نے بھارت اور روس دونوں کو کھو دیا ہے۔ ان کے بقول، یہ دونوں ممالک چین کے ساتھ اپنے تعلقات مزید گہرے کر رہے ہیں۔

یاد رہے کہ ٹرمپ نے ۴ ستمبر کو بھارت کی جانب سے روسی تیل کی خریداری پر اصرار کے بعد نئی دہلی کے ساتھ مجوزہ تجارتی معاہدہ منسوخ کر دیا تھا۔ اس معاہدے میں بھارت کی جانب سے امریکی مصنوعات پر ٹیرف میں نمایاں کمی شامل تھی جو واشنگٹن کے لیے ایک بڑی کامیابی سمجھی جا رہی تھی۔

امریکی صدر نے اسی موقع پر یوکرین جنگ کے حوالے سے بھی بات کرتے ہوئے کہا کہ یورپ اس بحران کے حل اور کییف کے لیے سکیورٹی ضمانتیں فراہم کرنے میں مرکزی کردار ادا کرے گا۔

ٹرمپ کے مطابق، امریکہ اپنے اتحادیوں کی مدد کرے گا لیکن ترجیح یورپ کو دی جائے گی کیونکہ یورپی ممالک اس مسئلے کو ختم کرنے کے خواہاں ہیں۔ انہوں نے کہا:

ہم اس مسئلے کو حل کریں گے، یورپ اس میں مرکزی کردار ادا کرے گا، اور بالآخر سب کچھ ٹھیک ہو جائے گا۔

اگرچہ ٹرمپ نے کسی حتمی معاہدے کے لیے وقت کا تعین نہیں کیا، لیکن یورپی رہنما بدستور امریکہ پر دباؤ ڈال رہے ہیں کہ وہ یوکرین کے لیے زیادہ مؤثر سکیورٹی کردار ادا کرے۔