امریکہ جنگی طیارے یوکرین بھیجنے کی کوشش میں

23 فروری 2023

سچ خبریں:یوکرین کو اسالٹ ٹینک سمیت جدید ہتھیار بھیجنے کے بعد اب امریکہ اس ملک کو جنگی طیارے بھیجنے کی کوشش کر رہا ہے۔

یورپ میں اعلیٰ امریکی جنرل نے امریکی قانون سازوں کو بتایا کہ یوکرین کو جدید مغربی آلات بشمول F-16 لڑاکا طیارے، ڈرون اور طویل فاصلے تک مار کرنے والے میزائل بھیجنے سے کیف کو اپنی فضائی حدود کو کنٹرول کرنے اور روس کے خلاف اپنے دفاع کو مضبوط بنانے میں مدد مل سکتی ہے۔

پانچ باخبر ذرائع کے مطابق امریکی یورپی کمانڈ سینٹر کے کمانڈر کرسٹوفر کیولی کی 10 سے زائد سینیٹرز اور ایوان نمائندگان کے ارکان کے ساتھ بند کمرے میں ہونے والی میٹنگ کے بعد جن ان سے پوچھا گیا کہ کیا F-16 لڑاکا طیارے روس کے خلاف جنگ جیتنے میں یوکرین کی مدد کر سکتے ہیں تو انہوں نے مثبت جواب دیا۔

کیولی نے کہا ہے کہ یوکرین کو طویل فاصلے تک مار کرنے والے میزائلوں کی ضرورت ہے تاکہ اس کی افواج کو دور سے روسی ٹھکانوں کو نشانہ بنانے میں مدد مل سکے۔

انہوں نے میونخ سکیورٹی کانفرنس میں امریکی قانون سازوں سے کہا کہ واشنگٹن اور اس کے اتحادیوں کو چاہیے کہ وہ یوکرین کو جدید ترین ہتھیار بھیجیں جس میں جنگی طیارے، ڈرون اور میزائل شامل ہیں جن کی رینج 100 کلومیٹر سے زیادہ ہے ،یہ ہتھیار کیف کو روسی افواج کو پیچھے دھکیلنے کے لیے ایک بہتر پوزیشن میں ڈال دیں گے۔

اس امریکی جنرل کا یہ بھی خیال ہے کہ یوکرین کو اس سخت جنگ کو آگے بڑھانے کے لیے جدید آلات اور ہتھیاروں کی ضرورت ہے،یورپ میں امریکی کمانڈ سینٹر کے کمانڈر نے مزید کہا کہ مغرب کو یوکرین کی سرحد پر روسی پوزیشنوں تک مزید رسائی حاصل کرنے کے لیے کیف کو مسلح کرنا چاہیے، یاد رہے کہ اس امریکی جنرل کا یہ بیان ایسے وقت میں سامنے آیا ہے جب کہ ٹرانس اٹلانٹک خطے میں یوکرین کو جدید جنگی طیارے فراہم کرنے کے لیے بات چیت تیز ہو گئی ہے۔