حزب اللہ کے کمانڈر علی کرکی کو صیہونی کئی سال سے کیوں تلاش کر رہے تھے؟

?️ 30 ستمبر 2024

سچ خبریں: حزب اللہ کے کمانڈر علی کرکی کی شہادت کے بعد صیہونیوں کے خلاف حزب اللہ کی ایک بڑی مزاحمتی کارروائی کا راز افشا ہوا۔

المنار چینل کی رپورٹ کے مطابق حزب اللہ نے اعلان کیا ہے کہ شہید علی کرکی، جو بیروت کے جنوبی علاقے ضاحیہ پر صیہونی حکومت کے حملے میں شہید ہوئے، 1982 میں احمد قصیر کے ذریعے ہونے والے بڑے خودکش حملے کے منصوبہ سازوں اور شرکاء میں سے ایک تھے، جس نے اسرائیلی قابض فوج کے ایک اہم فوجی مرکز کو نشانہ بنایا تھا۔

یہ بھی پڑھیں: حزب اللہ کے اعلی کمانڈر شہید ابرہیم عقیل کون تھے؟

اس کارروائی میں بڑی تعداد میں صیہونی فوجی اور افسران ہلاک ہوئے جبکہ اسرائیلی انٹیلی جنس شاباک کے ایک یونٹ کے اہلکار بھی مارے گئے۔

یاد رہے کہ 19 سالہ لبنانی نوجوان احمد قصیر نے 11 نومبر 1982 کو ایک کار بم دھماکے کے ذریعے صور لبنان میں اسرائیلی فوجی ہیڈکوارٹر کو مکمل طور پر تباہ کر دیا تھا۔

اس آٹھ منزلہ عمارت میں صیہونی حکومت کے متعدد انٹیلی جنس اور فوجی اہلکار موجود تھے۔

اس خصوصی کارروائی میں 74 سے زائد اسرائیلی فوجی افسران اور اہلکار، بشمول بیروت میں اسرائیلی فوجی گورنر، ہلاک ہوئے، تاہم بعد میں اسرائیلی میڈیا نے مرنے والوں کی تعداد 141 بتائی اور کہا کہ 10 افراد لاپتہ ہیں۔

مزید پڑھیں: شہید نصراللہ کی قیادت کے 32 سال؛ فتح سے شہادت تک

احمد قصیر کا نام حزب اللہ لبنان نے سکیورٹی وجوہات کی بنا پر 1985 تک مخفی رکھا۔ اس وقت سید حسن نصراللہ نے ایک تقریب میں، جو لبنان کے شہر صور کی آزادی کے بعد شہید کے آبائی علاقے دیر قانون النہر میں منعقد ہوئی، اس لبنانی مجاہد کی شناخت ظاہر کی۔