ٹرمپ 100 روز میں امریکہ کے بدترین صدر قرار

سچ خبریں:تازہ امریکی سروے رپورٹس کے مطابق ڈونلڈ ٹرمپ نے اپنی صدارت کے ابتدائی 100 دنوں میں گزشتہ 80 سال کے دوران سب سے کم عوامی حمایت حاصل کی ہے، جس میں معیشت اور مہنگائی کے حوالے سے شدید عدم اطمینان ظاہر کیا گیا ہے۔

امریکہ کے معتبر اداروں کی تازہ ترین رائے عامہ کے جائزوں سے ظاہر ہوتا ہے کہ ڈونلڈ ٹرمپ گزشتہ 80 برسوں میں صدارت کے ابتدائی 100 دنوں میں سب سے کم مقبول امریکی صدر قرار پائے ہیں۔

یہ بھی پڑھیں:بائیڈن امریکی تاریخ کے بدترین صدر

عربی 21 نیوز ویب سائٹ کے مطابق، واشنگٹن پوسٹ، اے بی سی نیوز اور ابسوس انسٹیٹیوٹ جیسے تین معتبر امریکی اداروں کی جانب سے کیے گئے سروے نتائج ظاہر کرتے ہیں کہ ڈونلڈ ٹرمپ کو 100 دن کی مدت میں عوامی حمایت کی سطح پر دوسرے امریکی صدور کے مقابلے میں سب سے کم شرح حاصل ہوئی ہے۔

سروے کے مطابق، صرف 39 فیصد امریکی ٹرمپ کی کارکردگی سے مطمئن ہیں، جبکہ 55 فیصد ان کی کارکردگی سے نالاں اور 44 فیصد شدید مخالفت رکھتے ہیں۔

یہ مقبولیت گزشتہ دور میں ٹرمپ کے ابتدائی 100 دنوں کی 42 فیصد حمایت سے بھی کم ہے، اس کے برعکس، سابق صدر جو بائیڈن کو اپنی صدارت کے ابتدائی 100 دنوں میں 59 فیصد عوامی حمایت حاصل تھی۔

اگرچہ ٹرمپ اپنی اقتصادی پالیسیوں کو عظیم امریکہ کی بحالی کا ذریعہ قرار دیتے ہیں، مگر عوام کی رائے مختلف ہے،تازہ ترین سروے کے مطابق 72 فیصد امریکیوں کا ماننا ہے کہ ٹرمپ کی معاشی پالیسیاں ملک کو کساد بازاری کی طرف لے جا سکتی ہیں۔

– 73 فیصد امریکی معیشتی صورتحال کو خراب تصور کرتے ہیں۔

– 53 فیصد شہریوں کے مطابق ٹرمپ کے اقتدار میں آنے کے بعد اقتصادی حالت مزید بگڑی ہے۔

اس کے علاوہ 41 فیصد امریکیوں نے کہا کہ ان کی مالی حالت موجودہ اقتصادی حالات کے باعث بدتر ہو چکی ہے۔

– 62 فیصد کا خیال ہے کہ ٹرمپ کی وعدہ شدہ مہنگائی پر قابو پانے کی پالیسی ناکام رہی ہے اور قیمتوں میں اضافہ جاری ہے۔

رائے عامہ کے ان جائزوں میں یہ بھی سامنے آیا کہ 71 فیصد امریکیوں نے کہا کہ دنیا کے ساتھ تجارتی تعلقات پر عائد کی گئی ٹرمپ کی محصولات قیمتوں میں اضافے کا سبب بن رہی ہیں۔

– امیگریشن پالیسیوں کے حوالے سے بھی ٹرمپ کی حمایت تاریخی حد تک کم ہو گئی ہے، جبکہ ان کی صدارت کے ابتدائی ہفتوں میں انہیں اس حوالے سے کافی عوامی تائید حاصل تھی۔

مزید پڑھیں:امریکہ ایک کرپٹ اور فاشسٹ ملک ہے: ٹرمپ

تقریباً دو تہائی امریکی شہری (66 فیصد) ٹرمپ کی جانب سے عائد کردہ محصولات کے مخالف ہیں اور ان کا ماننا ہے کہ ٹرمپ اور ان کی تباہ کن پالیسیاں نہ صرف خود ان کے لیے بلکہ ریپبلکن پارٹی کے لیے بھی سیاسی خطرات کا باعث بنیں گی۔