قطر کا نیتن یاہو  کی اشتعال انگیز لفاظی پر شدید ردعمل

سچ خبریں:قطر نے اسرائیلی وزیراعظم نیتن یاہو  کے ان بیانات کی شدید مذمت کی ہے جن میں انہوں نے اسرائیل کو تمدن اور حماس کو بربریت قرار دیا، قطر نے ان دعوؤں کو سیاسی و اخلاقی دیوالیہ پن قرار دیتے ہوئے انسانی بحران پر عالمی توجہ دلائی۔

قطر کی وزارت خارجہ نے اسرائیلی وزیراعظم بنیامین نیتن یاہو  کی حالیہ گستاخانہ اور اشتعال انگیز لفاظی کو شدید تنقید کا نشانہ بنایا ہے، جن میں انہوں نے اسرائیل کو تمدن اور قطر کو بربریت کی حمایت کرنے والا ملک قرار دیا تھا۔

یہ بھی پڑھیں: صیہونی وزیر کا قطر پر الزام

قطری وزارت خارجہ نے ایک باضابطہ بیان جاری کرتے ہوئے کہا کہ نتنیاہو کے الزامات اشتعال انگیز، غیرذمہ دارانہ اور سیاسی و اخلاقی دیوالیہ پن کی عکاسی کرتے ہیں۔

وزارت نے کہا کہ کیا نہتے شہریوں کا قتل عام، جنگ کے ذریعے بھوک کا ہتھیار بنانا اور انسانی امداد کو روکنا وہ تمدن ہے جس کی اسرائیل نمائندگی کرتا ہے؟

بیان میں مزید کہا گیا کہ اسرائیل کی طرف سے مسلسل کی جانے والی جارحیت کو تمدن کے دفاع کا نام دینا ان ریاستوں کی یاد دلاتا ہے جو جھوٹے نعروں کے ذریعے نہتے شہریوں پر مظالم ڈھاتی رہی ہیں۔

 قطر نے واضح کیا کہ اس نے اپنے شراکت داروں کے ساتھ مل کر غزہ میں جنگ بندی، شہریوں کا تحفظ اور قیدیوں کی رہائی کے لیے سنجیدہ اور مسلسل کوششیں کی ہیں۔

قطر نے سوال اٹھایا کہ کیا وہ 138 اسرائیلی قیدی جو رہا کیے گئے، اسرائیل کے عسکری حملوں کے نتیجے میں آزاد ہوئے، یا ان ثالثی کوششوں کے ذریعے جن پر آج تنقید کی جا رہی ہے؟

بیان میں اس بات پر زور دیا گیا کہ غزہ کے عوام بدترین انسانی بحران کا سامنا کر رہے ہیں، جن میں محاصرہ، بھوک، ادویات کی قلت اور انسانی امداد کو بطور ہتھیار استعمال کرنا شامل ہے۔ یہ سب کیا اس تمدن کا حصہ ہے جسے اسرائیل دنیا کے سامنے پیش کرنا چاہتا ہے؟

قطر نے اس موقع پر اعلان کیا کہ وہ تمام تر دباؤ اور پروپیگنڈا کے باوجود مظلوم قوموں کی حمایت سے پیچھے نہیں ہٹے گا، اور بطور غیر جانبدار، قابلِ اعتماد ثالث، اپنا کردار جاری رکھے گا۔

مزید پڑھیں: قطر کی نیتن یاہو پر تنقید

وزارت خارجہ نے آخر میں کہا کہ قطر، مصر اور امریکہ کے ساتھ مل کر فوری جنگ بندی، انسانی امداد کی فراہمی اور پائیدار و منصفانہ امن کے حصول کے لیے کوششیں جاری رکھے گا۔