شمالی کوریا کا بیلسٹک میزائل تجربہ، امریکا سمیت متعدد ممالک کی نیندیں حرام ہوگئیں

?️ 25 مارچ 2021

پیانگ یانگ (سچ خبریں) شمالی کوریا نے آج دو مختصر فاصلے تک مار کرنے والے بیلسٹک میزائل تجر بے کیے، دونوں میزائل 19 منٹ کے وقفے سے داغے گئے، ان میزائلوں نے 450 کلو میٹر کا فاصلہ طے کیا اور 60 میٹر کی اونچائی تک گئے، شمالی کوریا کی جانب سے ان بیلسٹک میزائلوں کے تجرنے کے بعد امریکہ سمیت متعدد ممالک کی نیندیں خراب ہوگئی ہیں۔

تفصیلات کے مطابق امریکا، جاپان اور جنوبی کوریا کی جانب سے شمالی کوریا کے میزائل تجربے کی تصدیق کی گئی ہے، سیئول جوائنٹ چیف آف اسٹاف کا کہنا ہے کہ شمالی کوریا نے دو شارٹ رینج میزائل جاپانی سمندر میں فائر کیے۔

بیان میں کہا گیا ہے کہ یہ میزائل 450 کلومیٹر (280 میل) کی اڑان سے 60 کلومیٹر (37 میل) کی اونچائی تک پہنچے اور خیال کیا جاتا ہے کہ یہ زمین سے بیلسٹک میزائل داغے گئے ہیں۔

سیول کی قومی سلامتی کونسل نےان تجربات کی اطلاع کے بعد ایک اجلاس طلب کیا ہے اور صورتحال پر “گہری تشویش” کا اظہار کرتے ہوئے کہا ہے کہ وہ امریکا کے ساتھ اس معاملے پر جزیرہ نما کوریا کی سلامتی کی صورتحال کا جائزہ لے گی۔

امریکی حکام کا کہنا ہے کہ صورتحال کا جائزہ لیا جارہا ہے اور معاملے پر اتحادیوں سے مشاورت ہو رہی ہے، امریکا اور جاپان نے میزائلوں کے تجربات کی مذمت کی ہے۔ جاپان نے کہا کہ میزائلوں کے تجربات علاقائی سلامتی اور سکیورٹی کے لیے بڑا خطرہ ہے۔

سلامتی کونسل کی قراردادوں کے تحت شمالی کوریا پر بیلسٹک میزائل کی تیاری پر پابندی ہے تاہم شمالی کوریا نے ان پابندیوں کو خاطر میں نہ لاتے ہوئے میزائل تجربات کیے ہیں۔

دو کروز میزائلوں کے بعد شمالی کوریا نے مزید دو بیلسٹک میزائلوں کے تجربات کیے ہیں۔ جنوبی کوریا نے تصدیق کرتے ہوئے کہا کہ شمالی کوریا کی جانب سے دو میزائل فائر کیے گئے۔

واضح رہے کہ شمالی کوریا نے اس سے قبل دو میزائل جاپان کے بحیرہ اصفر میں داغے تھے، بیلسٹک میزائلوں کا تجربہ شمالی کوریا کی جانب سے ایک ہفتے میں دوسرا تجربہ ہے۔