عمیر رانا نے سکھ برادری کے دل جیت لیے

?️ 24 اگست 2021

کراچی (سچ خبریں) پاکستان کے معروف اداکار عمیر رانا اکثر اوقات اپنے متنازع بیانات کے سبب سرخیوں میں رہتے ہیں اس مرتبہ انہوں نے ننکانہ صاحب میں بیٹھے لنگر کھاتے ہوئے تصویر شیئر کی ہے جو کہ انٹرنیٹ صارفین کو خوب بھا گئی ہے۔اور خوب کمنٹس کئے جا رہے ہیں۔

پاکستان کے کئی بلاک بسٹر ڈراموں میں کام کرنے والے اداکار اکثر اوقات اپنے متنازع بیانات کے سبب خبروں میں رہتے ہیں۔حال ہی میں عمیر رانا نے اپنے انسٹا گرام اکاؤنٹ پر اپنی ایک نئی تصویر شیئر کی ہے جس میں وہ سر پر کیسری رنگ کا رومال باندھے زمین پر بیٹھے کھانا کھا رہے ہیں۔

عمیر رانا نے اپنی اس پوسٹ کے کیپشن میں مداحوں کو سکھ مذہب سے متعلق کچھ بنیادی معلومات بھی بتائی ہیں۔عمیر رانا نے اپنی پوسٹ کے کیپشن میں لکھا ہے کہ ’سکھ ازم نہیں  بلکہ ’سکھی‘صحیح لفظ ہے، سکھ مذہب میں خدمت ’سیوا‘ کرنا بھی ایک بنیادی تعلیم ہے۔‘

عمیر رانا نے لکھا ہے کہ ’ہر کوئی رضاکارانہ طور پر بنی نوع انسان اور خدا کی مخلوق کی خدمت کرتا ہے، سکھی کے لیے ضروری ہے کہ وہ درخت لگانے اور اس کی دیکھ بھال کرنے سے لے کر لنگر کی تیاری میں حصہ لے اور اسے آنے والوں کو پیش کرے۔‘

انہوں نے مزید لکھا کہ ’یہاں کسی قسم کا تعصب یا کوئی امتیازی سلوک نہیں کیا جاتا ہے، نہ مذہب نہ رنگ اور نہ ہی نسل سے متعلق، یہ تعلیمات شائستہ، انسان دوست اور عالمگیر ہیں، ان سب کا ہمیں بھی احترام کرنا چاہیے اور ان پر عمل کرنا چاہیے۔‘

عمیر رانا کی اس تصویر اور پوسٹ پر پاکستان کی سکھ کمیونٹی سمیت بھارتی سکھوں کی جانب سے بھی خوب کمنٹ کیے جا رہے ہیں اور انہیں ننکانہ صاحب گردوارے میں خوش آمدید کہا جا رہا ہے۔