صیہونیوں کے ہاتھوں زخمی ہونے والے73 سالہ فلسطینی مجاہد کی شہادت

?️ 18 جنوری 2022

سچ خبریں:فلسطینی شہر الخلیل میں ایک ہفتہ قبل صیہونی فوجی کے ہاتھوں ٹرک سے کچلے جانے والے 73 سالہ فلسطینی مجاہد شیخ سلمان الہذالین زخموں کی تاب نہ لاتے ہوئے شہید ہوگئے۔
فلسطینی ذرائع ابلاغ کی رپورٹ کے مطابق سرکردہ فلسطینی مجاہد شیخ سلیمان الہذالین کو ایک ہفتے قبل،صیہونی فوجی نے اپنے ٹرک سے کچل دیا تھا جس کے نتیجے میں وہ شدید زخمی ہوگئے تھے، فلسطینی ذرائع نے الخلیل کی عوامی استقامتی تحریک کے سرکردہ رہنما شیخ سلیمان کی شہادت کی تصدیق کردی ہے۔

دوسری جانب اطلاعات ہیں کہ النقب کے علاقے میں صیہونی فوجیوں کی جارحیت میں تین فلسطینی لڑکیاں زخمی ہوئی ہیں جبکہ ایک فلسطینی لڑکی کو صیہونی فوجی اغوا کرکے لے گئے۔

کہا جارہا ہے کہ آج صبح ایک بار پھر نقب کے گاؤں اطرش کے علاقے میں صیہونی فوجیوں اور فلسطینیوں کے درمیان جھڑپیں ہوئی ہیں اور صیہونی فوجیوں نے کم سے کم ایک سو فلسطینیوں کو گرفتار کرلیا ہے۔

قابل ذکر ہے کہ انیس سو اڑتالیس کے مقبوضہ علاقوں میں پچھلے کئی روز سے صیہونی فوجیوں اور فلسطینیوں کے درمیان جھڑپوں کا سلسلہ جاری ہے۔