مقبوضہ کشمیر میں بھارتی فوج کی موجودگی اقوام متحدہ کے چارٹر کی خلاف ورزی ہے

🗓️ 17 اپریل 2021

سرینگر (سچ خبریں)  بھارتی دہشت گرد فوج گذشتہ کئی دہائیوں سے مقبوضہ کشمیر میں غیرقانونی طریقے سے قابض ہوئی ہے اور کشمیری عوام کا خون بہارہی ہے لیکن دنیا میں انسانی حقوق کا دعویٰ کرنے والے نام نہاد اور جھوٹے ممالک ان مظالم پر مکمل طور پر خاموش تماشائی بنے بیٹھے ہیں۔

انہی مظالم کو دیکھنے کے لیئے جموں و کشمیر پیپلز فریڈم لیگ کے چیئرمین محمد فاروق رحمانی نے مقبوضہ کشمیر سے بھارتی فوجیوں کے انخلا کا مطالبہ کیا ہے۔

کشمیر میڈیا سروس کے مطابق محمد فاروق رحمانی نے سرینگر سے جاری ایک بیان میں افغانستان سے امریکی فوج کے انخلا کے صدر جو بائیڈن کے فیصلے کا خیر مقدم کرتے ہوئے کہا کہ ایسا ہی مقبوضہ جموں و کشمیر میں بھی ہونا چاہیے جہاں بھارتی فوج اقوام متحدہ کے چارٹر کی خلاف ورزی کرتے ہوئے گزشتہ کئی دہائیوں سے انسانی خون بہا رہی ہے اور کشمیریوں کو بے گھر کر رہی ہے۔

انہوں نے امریکی صدر سے اپیل کی کہ وہ مسئلہ کشمیر کو پر امن مذاکرات کے ذریعے حل کرانے کے اپنے انتخابی وعدے کو پورا کریں۔

محمد فاروق رحمانی نے کہا کہ مقبوضہ علاقے میں انسانی حقوق کی خلاف ورزیوں کا سلسلہ بند کر کے تمام فریقوں کے درمیان بات چیت کیلئے فضا بنائی جانی چاہیے۔

انہوں نے امید ظاہر کی کہ امریکی صدر جو بائیڈن کشمیریوں کی خواہشات کے مطابق پرامن طور پر تنازعہ کشمیر کے حل کی طرف کوششوں کی حوصلہ افزای کریں گے۔