سرینگر (سچ خبریں) آزاد کشمیر کے انتخابات میں پاکستان تحریک انصاف کی کامیابی پر مقبوضہ کشمیر کی عوام اور مختلف آزادی پسند تحریکوں کی جانب سے وزیر اعظم عمران خان کو مبارکباد پیش کی کرتے ہوئے امید ظاہر کی کہ وہ مقبوضہ کشمیر کی عوام کے صحیح وکیل بن کر دکھائیں گے۔
تفصیلات کے مطابق مقبوضہ کشمیر مسلم لیگ جموں و کشمیر کے قائمقام چیئرمین عبدالاحد پرہ نے آزاد جموں و کشمیر کے انتخابات میں پاکستان تحریک انصاف کی کامیابی پر وزیر اعظم پاکستان عمران خان کو مبارک باد پیش کی ہے۔
کشمیرمیڈیاسروس کے مطابق عبدالاحد پرہ نے سرینگر سے جاری ایک بیان میں کہاکہ عمران خان نے جس طرح کشمیر کاز کو دنیا کے سامنے پیش کیا ہے یہ اسی کا نتیجہ ہے کہ آزاد کشمیر کے غیور عوام نے تحریک انصاف کے امیدواروں کوووٹ دے کر انتخابات میں کامیاب کیا ہے۔
انہوں نے کہاکہ مقبوضہ جموں و کشمیر کے عوام کوامید ہے کہ اب عمران خان مزید مضبوطی کے ساتھ کشمیریوں کے وکیل بن کر پوری دنیا کو اس بات پر آمادہ کریں گے کہ دیرینہ تنازعہ کشمیر کو حل کئے بغیر جنوبی ایشیاء میں پائیدار امن و استحکام قائم نہیں ہو سکتا۔
انہوں نے کہاکہ کشمیریوں کا مسئلہ کشمیر پر موقف اتنا مضبوط اور حق پر مبنی ہے کہ دنیا کی کوئی طاقت اسے جھٹلا نہیں سکتی۔
انہوں نے امید ظاہر کی کہ آزاد کشمیر کے انتخابات میں کامیابی حاصل کرنے والے تحریک انصاف کے امیدوار حریت پسند کشمیری عوام کی خواہشات ، امیدوں اور قربانیوں کو اجاگر کرنے میں کوئی کسر نہیں اٹھا رکھیں گے۔
