بھارتی فوج کی جانب سے مقبوضہ کشمیر میں قتل و غارت، حریت کانفرنس نے اہم بیان جاری کردیا

🗓️ 25 جولائی 2021

سرینگر (سچ خبریں) بھارتی حکومت کی جانب سے مقبوضہ کشمیر میں قتل و غارت کا سلسلہ جاری ہے جس کو دیکھتے ہوئے کل جماعتی حریت کانفرنس نے اہم بیان جاری کرتے ہوئے کہا ہے کہ بھارتی حکومت مقبوضہ کشمیر میں پکڑو اور قتل کرو کی پالیسی پر عمل پیرا ہے۔

تفصیلات کے مطابق مقبوضہ کشمیر میں کل جماعتی حریت کانفرنس نے کہا ہے کہ فسطائی بھارتی حکومت علاقے کے طول وعرض میں ایک بار پھر پکڑو اور قتل کرو کی پالیسی پر عمل پیرا ہے۔

کشمیرمیڈیا سروس کے مطابق کل جماعتی حریت کانفرنس کے معاون سیکرٹری جنرل خواجہ فردوس وانی ایک وفد کے ہمراہ بانڈی پورہ میں بھارتی فوجیوں کے ہاتھوں شہید ہونے والے نوجوانوں کے گھر گئے اور ان کے اہلخانہ سے اظہار یکجہتی کیا۔

خواجہ فردوس نے اس موقع پر شہید نوجوانوں کو شاندار خراج عقیدت پیش کرتے ہوئے بھارتی فوجیوں کی طرف سے سول آبادی کے خلاف طاقت کے وحشیانہ استعمال، گھروں کی تور پھوڑ اور دوران حراست قتل کی شدید مذمت کی۔

انہوں نے کہا کہ طاقت کے نشے میں چور بھارتی فورسز کے اہلکار کشمیریوں کو قتل کرکے خوش ہوجاتے ہیں۔

انہوں نے حق خوداردیت کے حصول کے لئے حریت پسند کشمیریوں کے عزم کا اعادہ کرتے ہوئے کہا ہماری تحریک آزادی کو فوجی طاقت سے شکست نہیں دی جاسکتی کیوں کہ اس کی جڑیں کشمیریوں کے دلوں میں پیوستہ ہیں جنہوں نے 27 اکتوبر 1947ء سے بھارت کے غیر قانونی قبضے کو کبھی تسلیم نہیں کیا۔

حریت رہنما نے مقبوضہ علاقے کے طول وعرض باالخصوص سرینگر شہر میں خوف ودہشت کا ماحول قائم کرنے کی شدید مذمت کی جہاں بھارتی صدر کے مجوزہ دورے سے پہلے لوگوں کو اپنے گھروں میں محصور کردیا گیا ہے اور نقل و حرکت پر پابندیاں عائد کی گئی ہیں جبکہ شہر کی اندرونی گلیوں کو بھی بند کردیاگیا ہے۔

انہوں نے کہا کہ نوشتہ دیوار واضح ہے کہ کشمیری بھارتی تسلط سے آزادی چاہتے ہیں، حریت رہنما نے اقوام متحدہ کے سیکرٹری جنرل پر زور دیا کہ وہ تنازعہ کشمیر کو اقوام متحدہ کی سلامتی کونسل کی قراردادوں اور کشمیریوں کی خواہشات کے مطابق حل کرانے کے لئے بھارت پر دبائو ڈالیں۔