بھارتی فوج نے مقبوضہ کشمیر میں دو کشمیری نوجوانوں کو شہید کردیا

🗓️ 17 مئی 2021

سرینگر (سچ خبریں) بھارتی فوج کی جانب سے مقبوضہ کشمیر میں دہشت گردی جاری ہے اور اب بھارتی دہشت گرد فوج نے تازہ ترین کاروائی کرتے ہوئے مزید دو کشمیری نوجوانوں کو شہید کردیا ہے۔

تفصیلات کے مطابق  مقبوضہ کشمیر میں بھارتی فوجیوں نے اپنی ریاستی دہشت گردی کی تازہ کارروائی کے دوران سرینگر کے علاقے کھنموہ میں دو اور کشمیری نوجوانوں کو شہید کردیا ہے۔

کشمیرمیڈیاسروس کے مطابق نوجوانوں کو بھارتی فوج، پولیس اور سینٹرل ریزرو پولیس فورس کے اہلکاروں کی طرف سے علاقے میں مشترکہ طور پر شروع کی گئی تلاشی اور محاصرے کی ایک کارروائی کے دوران شہید کیا گیا۔

جیسے ہی نوجوانوں کی شہادت کی خبر علاقے میں پھیلی سینکڑوں مرد، خواتین اور نوجوانوں نے پابندیوں کو خاطر میں نہ لاتے ہوئے گھروں سے نکل کر زبردست بھارت مخالف اور آزادی کے حق میں مظاہرے کئے، مظاہرین کھنموہ میں اس گھر کے باہر جمع ہوگئے جہاں فوجیوں نے نوجوانوں کو شہید کیا تھا اور ان کے بہیمانہ قتل کے خلاف فلک شگاف نعرے بلند کئے، انہوں نے کہاکہ شہید نوجوان بے گناہ تھے اور انہیں جعلی مقابلے میں شہید کیا گیا ہے۔

دوسری جانب کل جماعتی حریت کانفرنس نے حریت پسند کشمیری عوام سے 21 مئی جمعہ کو معروف آزادی پسند رہنمائوں میر واعظ مولوی محمد فاروق، خواجہ عبدالغنی لون اور شہدائے حول کا یوم شہادت شایان شان طورپر منانے کیلئے مکمل ہڑتال کی اپیل کی ہے۔

کل جماعتی حریت کانفرنس کے ترجمان نے سرینگر میں جاری ایک بیان کہا ہے کہ اس دن مقبوضہ علاقے میں جاری کشمیریوں کی نسل کشی کے خلاف احتجاجی ریلیاں نکالی جائیں گی۔