سرینگر (سچ خبریں) مقبوضہ کشمیر کی عوام نے وزیر اعظم عمران خان کی جانب سے مسئلہ کشمیر پر دیئے گئے دلیرانہ بیان کا خیرمقدم کرتے ہوئے اس بیان پر پاکستانی حکومت اور خاص کر عمران خان کا شکریہ ادا کیا ہے۔
تفصیلات کے مطابق مقبوضہ کشمیر میں تحریک مزاحمت کے چیئرمین بلال احمد صدیقی اور دیگر حریت رہنمائوں نے کشمیر کے بارے میں وزیر اعظم پاکستان عمران خان کے حالیہ بیان کا خیرمقدم کرتے ہوئے کہا ہے کہ وزیر اعظم کے اس بیان سے کشمیری عوام کے حوصلے بلند ہوئے ہیں۔
کشمیرمیڈیاسروس کے مطابق بلال احمد صدیقی نے سرینگر سے جاری ایک بیان میں کہاہے کہ وزیر اعظم عمران خان کی طرف سے اختیار کیاگیا موقف حکومت پاکستان کی کشمیر پالیسی کے بارے میں شکوک و شبہات پھیلانے والے لوگوں کیلئے چشم کشا ہے۔
کشمیری عوام اور حریت قیادت کو پاکستان اور وزیر اعظم عمران خان پر مکمل اعتماد ہے اور وہ تمام بین الاقوامی فورموں پرتنازعہ کشمیر کو اجاگر کرنے کی ان کی کوششوں کے معترف ہیں۔
انہوں نے کہاکہ وزیر اعظم عمران خان کا یہ موقف کہ جب تک بھارت 5 اگست 2019 سے قبل والی جموں و کشمیر کی پوزیشن بحال نہیں کرتا اس وقت اس سے کوئی مذاکرات یا تجارت نہیں ہوسکتی انتہائی قابل تعریف ہیں اور کشمیری عوام اور حریت قیادت ان کے اس موقف کی مکمل حمایت کرتے ہیں۔
انہوں نے کہاکہ جموں کشمیر کے محکوم عوام کو حق خود ارادیت کے حصول کی ان کی جدوجہد کی حمایت جاری رکھنے کی یقین دہانی پر ہم عمران خان کا شکریہ ادا کرتے ہیں۔
ادھر جموں و کشمیر پولیٹیکل ریزسٹنس موومنٹ کے جنرل سکریٹری ڈاکٹر مصعب نے واضح کشمیر پالیسی پر وزیر اعظم پاکستان عمران خان کا خیرمقدم کرتے ہوئے بھارت پر زور دیا ہے کہ وہ کشمیری عوام کی خواہشات کے مطابق تنازعہ کشمیر حل کرے۔
جموں و کشمیر انصاف پارٹی کے وائس چیئرمین محمد سلطان بٹ نے حکومت پاکستان کی طرف سے کشمیری عوام کی حق خود ارادیت کے حصول کی منصفانہ جدوجہد کی سیاسی، سفارتی اور اخلاقی حمایت جاری رکھنے کے عزم کے اعادے کا خیرمقدم کیا ہے۔
انہوں نے کہاکہ تنازعہ کشمیر کے حل کیلئے وزیر اعظم پاکستان کی کوششیں نوجوان کشمیری نسل کیلئے باعث تقویت ہیں۔
