بھارت تنازعہ کشمیر کے پرامن حل کے لیے ٹھوس اقدامات کرے: سول سوسائٹی ارکان

?️ 26 فروری 2024

سرینگر: (سچ خبریں) غیر قانونی طور پر بھارت کے زیر قبضہ جموں و کشمیر میں سول سوسائٹی کے ارکان نے بھارتی حکومت پر زور دیا ہے کہ وہ تنازعہ کشمیر کے پرامن حل کے لیے ٹھوس اقدامات کرے۔

میڈیا کے مطابق ڈاکٹر زبیر احمد، محمد فرقان، محمد اقبال شاہین اور سید حیدر حسین جیسی سرکردہ شخصیات نے سرینگر میں ایک مشترکہ بیان میں دفعہ 370اور 35-Aکو ان کی اصل حالت میں بحال کرنے کی ضرورت پر زور دیا۔

انہوں نے مظالم کے خاتمے اور اقوام متحدہ کی قراردادوں کے مطابق تنازعہ کشمیر کا فوری حل تلاش کرنے کی ضرورت پر زور دیا۔ سول سوسائٹی کے ارکان نے بڑھتی ہوئی کشیدگی اور مسئلہ کشمیرکے مختلف پہلوئوں کو اجاگر کرتے ہوئے بھارتی حکومت سے مطالبہ کیا کہ وہ سیاسی رکارٹوں کو دورکرکے دانشمندی کا مظاہرہ کرے۔

انہوں نے تنازعہ کشمیرسے متاثرہ پونے دو ارب لوگوں کی فلاح و بہبود کو مدنظر رکھتے ہوئے خطے میں امن و استحکام کو ترجیح دینے کی اہمیت پر زور دیا۔بیان میں بھارت اور پاکستان کے درمیان سفارتی اور سیاسی روابط کے ذریعے دشمنی کو کم کرنے اور خیر سگالی کو فروغ دینے کی ضرورت پر زور دیا گیا۔

سول سوسائٹی کے نمائندوں نے امید ظاہر کی کہ ان کی اپیل کو محض مشورے کے طور پر نہیں بلکہ کشمیر کے مظلوم عوام کی امنگوں کی نمائندگی کے طور پر تسلیم کیا جائے گا۔امن اور تنازعہ کشمیر کے حل کے لیے ان کا مطالبہ نہ صرف کشمیری عوام بلکہ جنوبی ایشیائی خطے کے کروڑوں لوگوں کی بھی خواہش ہے۔بیان میں پائیدار امن و استحکام کے حصول اور دیرینہ مسائل کے حل کے لیے بات چیت، تعاون پختہ عزم کی ضرورت پر زور دیاگیاہے۔