سچ خبریں: گورنر ہاؤس پنجاب میں صدر مملکت آصف زرداری کی سالگرہ تقریب کا انعقاد کیا گیا، جس میں گورنر پنجاب، ثمینہ خالد گھرکی اور دیگر رہنماؤں نے بھی شرکت کی، تقریب کے اختتام پر صدر زرداری کی سالگرہ کا کیک کاٹا گیا۔
تقریب سے خطاب کرتے ہوئے گورنر پنجاب سلیم حیدر نے کہا کہ محترمہ بینظیر بھٹو کی شہادت کے بعد آصف زرداری نے پارٹی کی قیادت کو باپ کی طرح سنبھالا۔
یہ بھی پڑھیں: حکومت اور پیپلز پارٹی کی مذاکرات
انہوں نے مزید کہا کہ پاکستان میں ہمیشہ دھاندلی کا شور مچایا جاتا ہے، آصف زرداری نے اس کا حل پیش کیا تھا مگر اس پر عملدرآمد نہیں ہوا۔
گورنر پنجاب نے پاک ایران گیس پائپ لائن کو مسائل کا حل قرار دیا۔
مسلم لیگ (ن) سے اتحاد کے حوالے سے سلیم حیدر نے کہا کہ یہ اتحاد شوق یا محبت کا نہیں بلکہ مجبوری کا ہے۔
اگر (ن) لیگ کے ساتھ اتحاد نہ کرتے تو ملک شاید اس حالت میں بھی نہ ہوتا۔
تقریب سے خطاب کرتے ہوئے راجہ پرویز اشرف نے کہا کہ پاکستان ہم سب کا ہے اور ہر ادارے کو اپنی حدود میں رہنا چاہیے۔
انہوں نے کہا کہ پنجاب اسمبلی میں کم تعداد ہونے کے باوجود ہم آصف زرداری کی دانش کی وجہ سے گورنر ہاؤس میں بیٹھے ہیں۔
مزید پڑھیں: کیا مسلم لیگ(ن) تنہا ہو چکی ہے؟
راجہ پرویز اشرف نے کہا کہ سیاست کا پینڈولم ہمیشہ حرکت میں رہتا ہے اور لیڈر اپنی پارٹی کے لیے جگہ بناتا ہے۔
پیپلز پارٹی حکومت کو سہارا نہ دے تو ہلچل مچ جائے گی، انہوں نے کہا کہ ایک پارٹی نے نوجوان نسل میں نفرت بھر دی ہے۔
