ہنگری کا 400 پاکستانی طلبا کو فل سکالرشپ دینے کا اعلان، کئی یادداشتوں پر دستخط ہوگئے

?️ 17 اپریل 2025

اسلام آباد: (سچ خبریں) ہنگری نے 400 پاکستانی طلبا کو فل سکالرشپ دینے کا اعلان کرتے ہوئے پاکستان کے ساتھ کئی مفاہمتی یادداشتوں پر دستخط کردیئے۔ وفاقی دارالحکومت اسلام آباد میں دفتر خارجہ میں دونوں ممالک کے وزرائے خارجہ کی مشترکہ پریس کانفرنس سے خطاب کرتے ہوئے نائب وزیراعظم اور وزیر خارجہ اسحاق ڈار نے کہا کہ ہنگری کے ہم منصب کو پاکستان کے دوسرے دورے پر خوش آمدید کہتے ہیں، یہ دورہ دونوں ممالک کے درمیان دہائیوں کے تعلق کو مزید تقویت دے گا، ہنگری پاکستان کے لیے ایک مثبت اور فائدہ مند دوست ملک رہا ہے، پاکستان ہنگری کے ساتھ تعلقات کو مزید بہتر کرنے کا اعادہ کرتا ہے، ہنگری نے پاکستان کی صنعتی شعبے میں خدمات انجام دی ہیں، ہنگری کی مدد سے پاکستان میں تجارت اور صنعت کے شعبے میں 100 سے زائد افراد نے اپنے ہنر کا مظاہرہ کیا۔

انہوں نے بتایا کہ پاکستان اور ہنگری کے درمیان متعدد مفاہمتی یادداشتوں پر دستخط ہوئے ہیں، معاہدوں میں دونوں ممالک کے مابین تجارت اور صنعت کو مزید تقویت دینا شامل ہے، دونوں ممالک نے غزہ کی صورتحال پر بھی بات چیت کی، افغانستان سے درپیش مسائل سے ہنگری کے وزیر خارجہ کو آگاہ کیا، اس وقت پاکستان کو افغانستان سے سکیورٹی مسائل کا سامنا ہے جس سے متعلق اپنے ہم منصب کو بتایا، پاکستان اور افغانستان کے درمیان ہونے والے سفارتی سطح پر ملاقاتوں کا بھی تذکرہ کیا گیا، اس معاملے پر ہنگری نے مثبت جواب دیا۔

اس موقع پر ہنگری کے وزیر خارجہ پیٹر سیجارٹو نے اپنے خطاب میں اعلان کیا کہ ہنگری کی جانب سے 400 پاکستانی طلبا کو فل اسکالر شپ دی جائے گی، ابھی تک پاکستان کی طرف سے 1700 کے قریب طلبا کی درخواستیں موصول ہو چکی ہیں، پاکستان اور ہنگری کے درمیان سفارتی تعلقات کو 60 سال مکمل ہو چکے ہیں، ہم یقین رکھتے ہیں کہ دونوں ممالک کے درمیان سفارتی تعلقات کو مزید مستحکم کرنے کی ضرورت ہے، دونوں ممالک کے درمیان تجارت، صنعت اور دیگر شعبوں کو مزید بہتر کرنے کی ضرورت ہے، پاکستان اور ہنگری کے درمیان بہت سی چیزیں یکساں ہیں، پاکستان اور ہنگری کے درمیان ثقافتی لحاظ سے بھی بہت چیزیں مشترک ہیں۔

ان کا کہنا ہے کہ پاکستان کو افغانستان کی سر زمین سے درپیش مسائل سے ہم بخوبی آگاہ ہیں، پاکستان افغانستان سمیت خطے میں امن کا خواہاں ہے، ہم پاکستان کے ساتھ اس کوشش میں شامل ہیں کہ خطے میں امن کی صورتحال برقرار رہے، ہم پاکستان کو خطے میں امن کی بحالی کے لیے اچھے دوست کی طرح دیکھتے ہیں، اس وقت یوکرین اور روس کے درمیان جو جنگ ہے، ہنگری اور پاکستان اس خطے میں بھی امن کے خواہاں ہیں، کچھ یورپی ممالک نہیں چاہتے یوکرین اور روس کے درمیان جو جنگ ہے وہ ختم ہو۔