ہم آرمی چیف کی تعیناتی کے معاملے پر پیچھے ہٹ گئے ہیں:عمران خان

🗓️ 16 نومبر 2022

اسلام آباد: (سچ خبریں) چئیرمین تحریک انصاف عمران خان کی سینئر صحافیوں اور اینکر پرسن سے ملاقات ہوئی ہے۔میڈیا رپورٹس کے مطابق عمران خان نے صحافیوں سے حالیہ ملاقات میں کہا کہ ہم آرمی چیف کی تعیناتی کے معاملے پر پیچھے ہٹ گئے ہیں۔ اس معاملے پر پیچھے بیٹھ کر سب دیکھ رہے ہیں۔انہوں نے کہا کہ نوازشریف چاہتا ہے کوئی ایسا چیف آئے جو نوازشریف کے معاملات اور کیسز کا خیال رکھے۔

چئیرمین پی ٹی آئی نے مزید کہا کہ امریکہ سے لڑائی نہیں مثبت اور بہتر تعلقات بہتر چاہتا ہوں۔امریکا کے معاملے میں ذاتی مفاد پر قومی ترجیحات کو فوقیت دوں گا۔ حکومت سے مذاکرات سے متعلق عمران خان نے یہ بھی کہا کہ مذاکرات کا میسج آیا کہ کمیٹی سے مذاکرات کریں لیکن میں نے انکار کردیا ۔

الیکشن کی تاریخ دو پھر آگے بات ہوگی۔صاف شفاف الیکشن ہی بحران کا واحد حل ہیں۔

امریکا کے معاملے پر بیان کو غلط طریقے سے پیش کیا گیا۔امریکا نے میری حکومت گرائی تھی لیکن ملکی مفاد کی وجہ سے ان سے اچھے تعلقات رہیں گے۔عمران خان نے کہا کہ توشہ خانہ کیس پر میں دبئی لندن اور پاکستان میں متعلقہ افراد کے خلاف کیس کریں گے۔انہوں نے توشہ خانہ کیس سے متعلق مزید کہا کہ جو سامان فروخت کیا وہ اسلام آباد میں فروخت کیا، رسیدیں اور تاریخ توشہ خانہ میں موجود ہیں ۔

توشہ خانہ سے متعلق جب گواہی میں جائیں گی کیس ختم ہو جائے گا۔خیال رہے کہ سابق وزیراعظم عمران خان کا گھڑی فروخت کرنے سے متعلق عمر فاروق کے بیان پر ردعمل آ گیا۔عمران خان کا کہنا ہے کہ بس بہت ہو گیا،کل نجی ٹی وی چینل اور اینکر شاہزیب خانزادہ نے مشہور فراڈیے کی بے بنیاد کہانی کے ذریعے مجھ پر بہتان لگایا۔ سابق وزیر اعظم عمران خان نے ٹویٹر پر اپنے بیان پر کہا کہ میں نے اپنے وکلاء سے بات کی ہے اور میں نجی ٹی وی چینل،اینکر شاہزیب خانزادہ اور جعلساز کے خلاف نہ صرف پاکستان میں بلکہ یوکے اور یو اے ای میں بھی مقدمہ چلانے کا ارادہ رکھتا ہوں۔