چالیس سال سے فتنہ پھیلانے والوں سبق سکھا دیا گیا۔ رانا ثناءاللہ

?️ 19 اکتوبر 2025

فیصل آباد (سچ خبریں) مشیر وزیراعظم و سینیٹر رانا ثناءاللہ نے کہا ہے کہ جو چالیس سال سے فتنہ پھیلا رہے تھے ان کو سبق سکھا دیا ہے۔

فیصل آباد میں کارکنوں سے گفتگو کرتے ہوئے رانا ثناءاللہ کا کہنا تھا کہ تحریک انصاف دور میں مخالفین کو جیلوں میں ڈالا گیا، میرے خلاف سزائے موت والا مقدمہ بنایا گیا۔ اُنہوں نے پی ٹی آئی پر تنقید کے نشتر چلاتے ہوئے کہا کہا کہ جب اپوزیشن میں تھے تب بھی ٹیبل پر بیٹھنے کی بات کرتے تھے، ملک فتنہ، فساد، جارحیت سے نہیں اتفاق سے آگے چلتے ہیں، اس وقت بھی سابق وزیراعظم نے مذاکرات کی بات پر کہا کسی کو نہیں چھوڑوں گا۔

مشیر وزیراعظم کا کہنا تھا کہ اُس وقت یہ کہتے تھے کسی کو معاف نہیں کریں۔ اب اُن کو معافی نہیں مل رہی، وزیراعظم شہبازشریف نے میثاق پاکستان کی دعوت دی، اگر پاکستان مضبوط ہوگا تو ہم سب خوشحال ہوں گے، جو ملک فتنہ، فساد، انارکی کا شکار ہوئے وہاں حالات خراب ہوئے۔

رانا ثناءاللہ نے کہا کہ شام کے حالات سب کے سامنے ہے، جو ملک میں بیٹھ کر بات نہیں کرسکتے وہ انارکی، افراتفری چاہتے ہیں، افراتفری، انارکی کی حکومت اور عسکری قیادت کبھی اجازت نہیں دے گی، جو گزشتہ چالیس سال سے فتنہ پھیلا رہے تھے ان کو بھی سبق سکھادیا ہے۔

اُن کا کہنا تھا کہ اب پاکستان میں دہشت گردی رکے گی اور ملک تیزی سے ترقی کرے گا، تحریک انصاف دور میں فیصل آباد میں کوئی ترقیاتی کام نہیں ہوئے، جب تک زندگی ہے خدمت کا سفر جاری رہے گا۔