حکمرانوں کو کہہ دیا اسرائیل کو تسلیم کرنے کا سوچنا بھی نہیں۔ مولانا فضل الرحمان

?️ 19 اکتوبر 2025

بھکر (سچ خبریں) سربراہ جے یو آئی نے کہا ہے کہ حکمرانوں کو کہہ دیا ہے کہ اسرائیل کو تسلیم کرنے کا سوچنا بھی نہیں۔

بھکر میں اجتماع سے خطاب کرتے ہوئے مولانا فضل الرحمان کا کہنا تھا کہ مسلمانوں میں فتنے پیدا کیے جارہے ہیں، فتنوں کا خاتمہ امت کی ذمہ داری ہے، بہت سے شعبوں میں کام کرنے کی ضرورت ہے۔

اُنہوں نے کہا کہ اسرائیل نے ہزاروں فلسطینیوں کو بربریت کا نشانہ بنایا، اتنے بڑے جرائم کے بعد آپ کہہ رہے ہیں کہ اسرائیل کو تسلیم کیا جائے، عالمی عدالت نے نیتن یاہو کو نسل کشی کا مرتکب قرار دیا ہے، عالمی عدالت نے نیتن یاہو کو گرفتار کرنے کا حکم دیا ہے۔

سربراہ جے یو آئی کا کہنا تھا کہ ہم فلسطین کا یکطرفہ فیصلہ کرنے والےکون ہوتے ہیں، حکمرانوں کو کہہ دیا ہے کہ اسرائیل کو تسلیم کرنے کا سوچنا بھی نہیں، ورنہ ہمارے شدید ردعمل کا سامنا کرنا پڑے گا۔