زیادہ تر اسرائیلی قیدی ہماری ہی فوج کی فائرنگ سے مارے گئے:صہیونی جنرل 

?️ 9 دسمبر 2025

 زیادہ تر اسرائیلی قیدی ہماری ہی فوج کی فائرنگ سے مارے گئے:صہیونی جنرل 

 اسرائیلی فوج کے ریٹائرڈ جنرل نِتسان آلون نے اعتراف کیا ہے کہ غزہ میں بڑی تعداد میں اسرائیلی قیدی حماس کے ہاتھوں نہیں، بلکہ خود اسرائیلی فوج کی بمباری اور فرینڈلی فائراپنی ہی فوج کی فائرنگ سے مارے گئے۔

ایرنا کے مطابق، نِتسان آلون نے عبرانی اخبار یدیعوت آحارونوت کو دیے گئے ایک متنازع انٹرویو میں بتایا کہ شمالی غزہ کے علاقے جبالیا میں موجود زیادہ تر اسرائیلی قیدی شدید فضائی حملوں اور زمینی کارروائیوں کے دوران اسرائیلی فوج کی ہی فائرنگ کا شکار ہوئے۔

انہوں نے کہا کہ 7 اکتوبر 2023 کے حملے کے بعد انٹیلی جنس کی سنگین ناکامیوں اور میدانِ جنگ میں افراتفری کی وجہ سے فوج کو قیدیوں کے ٹھکانوں کے بارے میں درست معلومات حاصل نہیں تھیں، کیونکہ قیدیوں کو مسلسل ایک جگہ سے دوسری جگہ منتقل کیا جا رہا تھا۔

آلون نے مزید کہا بہت سے قیدی زندہ حالت میں غزہ منتقل کیے گئے تھے، مگر بعد میں اسرائیلی فوج کی بمباری اور زمینی آپریشنز کے دوران جان سے ہاتھ دھو بیٹھے۔

رپورٹس کے مطابق جنگ بندی کے بعد حماس نے 20 زندہ اسرائیلی قیدیوں اور 26 لاشوں کو تقریباً 2 ہزار فلسطینی قیدیوں کے بدلے اسرائیل کے حوالے کیا ہے، تاہم دو مزید ہلاک ہونے والے قیدیوں کی لاشیں—جن میں ایک اسرائیلی پولیس افسر اور ایک تھائی مزدور شامل ہے ابھی تک غزہ میں موجود ہیں۔

یاد رہے کہ اسرائیل نے 7 اکتوبر 2023 کو غزہ کے خلاف جنگ کا آغاز دو مقاصد کے تحت کیا تھا: حماس کا خاتمہ اور اپنے قیدیوں کی واپسی، مگر وہ ان اہداف میں ناکام رہا اور بالآخر قیدیوں کے تبادلے کے معاہدے پر مجبور ہوا۔

حماس نے اکتوبر 2025 میں جنگ کے خاتمے اور قیدیوں کے تبادلے کے معاہدے کی باضابطہ تصدیق کی، جبکہ اسرائیلی فوج نے بھی جنگ بندی کے نفاذ کا اعلان کیا۔ اس کے باوجود، رپورٹس کے مطابق اسرائیل جنگ بندی معاہدے کی شقوں پر عملدرآمد میں رکاوٹیں ڈال رہا ہے اور خلاف ورزیاں کر رہا ہے۔