اسلام آباد (سچ خبریں) وزیرِ اعظم عمران خان کا عالمی وباء کورونا وائرس کے پھیلاؤ سے بچاؤ کے لیے بنائی گئی حکمتِ عملی پر کہنا ہے کہ پاکستان کو کورونا وائرس کے بدترین اثرات سے محفوظ رکھنے میں کامیاب رہے، ہماری کورونا سے متعلق حکمتِ عملی کو دنیا نے سراہا ہے۔
وزیراعظم عمران خان نے مائیکرو بلاگنگ ویب سائٹ ٹوئٹر پر اپنے ایک پیغام میں نیشنل کمانڈ اینڈ کنٹرول سینٹر (این سی او سی) کی ٹیم کو خراجِ تحسین پیش کیا ہے۔وزیرِ اعظم عمران خان نے اپنے بیان میں کہا ہے کہ اللّٰہ کے کرم سے پاکستان کو کورونا وائرس کے بدترین اثرات سے محفوظ رکھا، ہماری کورونا سے متعلق حکمتِ عملی کو دنیا نے سراہا ہے۔
دوسری جانب نیشنل کمانڈ اینڈ آپریشن سینٹر (این سی او سی) کی تشکیل کو 500 دن مکمل ہونے کے موقع پر این سی او سی کے سربراہ اور وفاقی وزیر اسد عمر نے پاک فوج کے شعبہ تعلقاتِ عامہ (آئی ایس پی آر) کی این سی او سی کے حوالے سے ویڈیو شیئر کی ہے۔
اسد عمر کا کہنا ہے کہ آج این سی او سی کی تشکیل کے 500 دن مکمل ہو گئے، اس موقع پر بنائی جانے والی دستاویزی فلم میں وہ تمام پہلو ہیں جن پر کام کر کے پاکستانی قوم نے کورونا وائرس کی وباء کا مقابلہ کیا اور دنیا سے پزیرائی حاصل کی۔