کورونا وائرس کی چوتھی لہرکا بھی کامیابی سے مقابلہ کر رہے ہیں:فواد چوہدری

?️ 8 اگست 2021

اسلام آباد(سچ خبریں)وزیرِ اطلاعات و نشریات فواد چوہدری کا این سی او سی کے قیام کے 500 دن مکمل ہونے  پر کہنا ہے کہ کورونا وائرس کی چوتھی لہرکا بھی کامیابی سے مقابلہ کر رہے ہیں این سی اوسی نے کورونا وائرس سے نمٹنے کے لیے بہترین فیصلے کیئے، آج ہمارے ہاں کورونا وائرس کی شرح دیگر ممالک کی نسبتاً بہت کم ہے۔

وزیرِ اطلاعات و نشریات فواد چوہدری نے این سی او سی کے قیام کے 500 دن مکمل ہونے پر مبارک باد دیتے ہوئے کہا ہے کہ حکومت نے اسمارٹ لاک ڈاﺅن کی متوازن حکمت عملی اپنائی جس کا محور غریب اور دیہاڑی دارطبقہ تھا، اگر ملک میں مکمل لاک ڈاؤن کر دیا جاتا تو اس کے بھیانک نتائج مرتب ہوسکتے تھے۔

انہوں نے مزید کہا کہ پاکستان آج این سی او سی کی کاوشوں کی بدولت کوروناوائرس کی چوتھی لہر کا بھی کامیابی سے مقابلہ کر رہا ہے۔دوسری جانب نیشنل کمانڈ اینڈ آپریشن سینٹر (این سی او سی) کی تشکیل کو 500 دن مکمل ہونے کے موقع پر این سی او سی کے سربراہ اور وفاقی وزیر اسد عمر نے پاک فوج کے شعبہ تعلقاتِ عامہ (آئی ایس پی آر) کی این سی او سی کے حوالے سے ویڈیو شیئر کی ہے۔

اسد عمر کا کہنا ہے کہ آج این سی او سی کی تشکیل کے 500 دن مکمل ہو گئے، اس موقع پر بنائی جانے والی دستاویزی فلم میں وہ تمام پہلو ہیں جن پر کام کر کے پاکستانی قوم نے کورونا وائرس کی وباء کا مقابلہ کیا اور دنیا سے پزیرائی حاصل کی۔