پاکستان میں کورونا مثبت کیسز کی شرح 13 فیصد تک جا پہنچی

?️ 25 جنوری 2022

اسلام آباد (سچ خبریں)عالمی وبا کورونا وائرس کا قہر جاری ہے کورونا مریضوں اور اموات میں مسلسل اضافہ ہو رہا ہے، کورونا کی پانچویں لہر کی شدت برقرار ہے ، ایک روز میں 17 اموات ریکارڈ کی گئی اور مثبت کیسز کی شرح تیرہ فیصد تک جا پہنچی۔ ملک میں 24 گھنٹے میں کورونا سے مزید 17 افراد انتقال کرگئے۔

تفصیلات کے مطابق پاکستان میں کورونا مریضوں اوراموات میں مسلسل اضافہ جاری ہے ، نیشنل کمانڈ اینڈ آپریشن سینٹر نے ملک میں جاری کورونا وبا کے تازہ ترین اعدادو شمار جاری کردیئے ہیں۔جس میں بتایا گیا ہے کہ ملک میں 24 گھنٹے میں کورونا سے مزید 17 افراد انتقال کرگئے، جس کے بعد کورونا سے انتقال کرنے والے افراد کی مجموعی تعداد 29 ہزار 122 ہوگئی ہے۔

این سی اوسی کا کہنا ہے کہ 24گھنٹے میں کورونا کے 49 ہزار 595 ٹیسٹ کیے گئے، جس میں سے کورونا کے مزید6 ہزار 357 کیسز رپورٹ ہوئے ، اس دوران ملک میں کورونا کے کیسز مثبت آنے کی شرح 12.81 فیصد تک جا پہنچی ہے۔نیشنل کمانڈ ایںڈ آپریشن سینٹر نے بتایا کہ ملک میں کورونا کے ایک ہزار 113 زیرعلاج مریض انتہائی نگہداشت میں ہیں جبکہ ملک بھر میں کورونا سے متاثر ہونے والوں کی مجموعی تعداد 13 لاکھ81ہزار 152 تک پہنچ گئی ہے۔

اعداد و شمار کے مطابق سندھ میں کورونا کیسز کی تعداد پانچ لاکھ 29 ہزار 218 ، پنجاب میں 4 لاکھ 66 ہزار 164 ، خیبرپختونخوا میں ایک لاکھ 85 ہزار683 اور بلوچستان میں 33 ہزار 975 ہے جبکہ اسلام آباد میں ایک لاکھ 20 ہزار 128 ، گلگت بلتستان میں 10 ہزار510 اور آزاد کشمیر میں 35 ہزار474 کیسز سامنے آچکے ہیں۔