وکیل کے قتل کے مقدمے میں سابق وزیراعظم کی 2 ہفتوں کیلئے حفاظتی ضمانت منظور

انہوں نے عدالت سے استدعا کی کہ عمران خان کو عید الاضحیٰ تک ضمانت دی جائے تاہم عدالت نے 2 ہفتوں کے لیے ضمانت منظور کرلی۔

کوئٹہ میں قتل ہونے والے سینئر وکیل عبدالرزاق شرکے قتل کے خلاف تیسرے روز بھی عدالتی بائیکاٹ جاری رہا جب کہ وکلا کی جانب سے عبدالرزق سمیت دیگر شہید ہونیوالے وکلا کے لیے تعزیتی ریفرنس کا انعقاد کیا گیا۔

بلوچستان کی تمام عدالتوں میں احتجاجاً وکلا پیش نہیں ہوئے جس کے باعث سائلین کو سخت مشکلات کا سامنا کرنا پڑا۔

وکلا تنظیموں نے سینئر وکیل کے قتل کے خلاف تین روزہ عدالتی بائیکاٹ کا اعلان کیا تھا، عبدالرزاق شر ایڈووکیٹ و دیگر شہید وکلا کی یاد میں منعقدہ تعزیتی ریفرنس سے خطاب کرتے ہوئے بلوچستان ہائی کورٹ بار ایسوسی ایشن کے صدر اصغر حریفال ایڈووکیٹ اور کوئٹہ بار ایسوسی ایشن کے صدر عابد کاکڑ ایڈووکیٹ کا کہنا تھا کہ بلوچستان میں وکلا کی قربانیاں نئی نسل کے لیے مشعل راہ ہیں۔

انہوں نے کہا کہ خطے میں سب زیادہ وکلا کو پاکستان میں شہید کیا گیا، حکومت شہدا وکلا کے قتل کے حقائق سامنے لائے، بلوچستان میں وکلا کو تواتر سے ٹارگٹ کیا جارہا ہے، وکلا کے بغیر ملک چل نہیں سکتا نہ ہی وکلا کو مائنس کیا جاسکتا ہے۔

ان کا کہنا تھا کہ وکلا معاشرے کا وہ طبقہ ہے جس سے قوم کی ترقی وابستہ ہے، حکومت وکلا کے قتل کے تدارک کے لیے کچھ نہیں کر رہی، ملک میں جرائم پیشہ افراد آزاد ہیں اور شریف لوگوں کے لیے کوئی جگہ نہیں، وکلا کے قاتلوں کو قانون کے کٹہرے میں لایا جائے۔

اس کے علاوہ ہائی کورٹ نے پاکستان تحریک انصاف (پی ٹی آئی) کے چیئرمین عمران خان کی جانب سے مختلف مقدمات میں ضمانت کی درخواستوں پر فیصلہ محفوظ کرلیا۔

بعد ازاں محفوظ فیصلہ سناتے ہوئے اسلام آباد ہائی کورٹ نے چیئرمین تحریک انصاف کی 8 مقدمات میں 12 جون تک حفاظتی ضمانت منظور کرتے ہوئے انہیں متعلقہ عدالت سے رجوع کرنے کا حکم دیا۔

اسلام آباد ہائی کورٹ نے اپنے فیصلے میں کہا کہ چیئرمین تحریک انصاف 12 جون تک متعلقہ عدالت سے رجوع کریں۔

سابق وزیراعظم 9 مئی کو گرفتاری کے بعد ہوئے پُرتشدد مظاہروں، توشہ خانہ ریفرنس اور دیگر ایک درجن سے زائد مقدمات کی سماعت میں پیش ہونے کے لیے اسلام آباد ہائی کورٹ پہنچے تھے۔

پی ٹی آئی کے آفیشل ٹوئٹر اکاؤنٹ پر پوسٹ کی گئی ایک ویڈیو میں سابق وزیر اعظم کی سیاہ رنگ کی ایس یو وی کو ہائی کورٹ کے احاطے میں داخل ہوتے ہوئے دیکھا گیا، ساتھ ہی ان کے سیکیورٹی اہلکار بلٹ پروف شیلڈز کے ساتھ پہرا دے رہے تھے۔

عمران خان آج فیڈرل جوڈیشل کمپلیکس کی ضلعی عدالت میں توشہ خانہ کے تحائف کی فروخت میں مبینہ فراڈ سے متعلق فرسٹ انفارمیشن رپورٹ (ایف آئی آر) میں ضمانت قبل از گرفتاری کی درخواست کے لیے بھی پیش ہوئے، جو 6 جون درج کی گئی تھی۔

قبل ازیں فیڈرل جوڈیشل کمپلیکس میں پیشی کے لیے عمران خان نے رجسٹرار سے گاڑی اندر لانے کی درخواست کی تھی، درخواست میں انہوں نے کہا تھا کہ ’حفاظت کو یقینی بنانے اور حاضری کے دوران ممکنہ خطرے کو کم سے کم کرنے‘ کے لیے عدالت کے احاطے میں اپنی گاڑی تک رسائی حاصل کرنا ان کے لیے بہت ضروری ہے۔

جس پر رجسٹرار نے پی ٹی آئی کے سربراہ کو اپنی گاڑی میں عدالت کے احاطے میں داخل ہونے کی اجازت دے دی۔

عمران خان کے پہنچنے سے قبل اسلام آباد ہائی کورٹ نے گزشتہ ماہ جاری کردہ اپنے حکم میں توسیع کی منظوری دی تھی جس میں اس نے توشہ خانہ ریفرنس میں پی ٹی آئی چیئرمین کے خلاف فوجداری کارروائی کو عارضی طور پر روک دیا تھا۔

توشہ خانہ ایک ایسا شعبہ ہے جس میں غیر ملکی حکام کی جانب سے پاکستانی سرکاری عہدیداروں کو دیے گئے تحائف اور دیگر قیمتی اشیا ذخیرہ کی جاتی ہیں اور یہ کابینہ ڈویژن کے زیر انتظام ہے۔

توشہ خانہ ریفرنس میں الزام لگایا گیا تھا کہ عمران خان نے بطور وزیراعظم توشہ خانہ سے اپنے پاس رکھے تحائف کی تفصیلات اور ان کی فروخت سے حاصل ہوئی آمدنی کو ’جان بوجھ کر چھپایا‘۔

سابق وزیراعظم کو تحائف کو اپنے پاس رکھنے پر کئی قانونی مسائل کا سامنا ہے، جو کہ الیکشن کمیشن سے ان کی نااہلی کا سبب بھی بنا، گزشتہ ماہ پی ٹی آئی کے سربراہ پر اس مقدمے میں فرد جرم عائد کی گئی تھی۔

آج سماعت کے دوران عدالت نے چیئرمین پی ٹی آئی کے وکیل خواجہ حارث کی سماعت ایک ہفتے کے لیے ملتوی کرنے کی استدعا پر حکم امتناع میں توسیع کردی۔

تاہم الیکشن کمیشن کے وکیل نے عدالت پر زور دیا کہ وہ اپنے اس حکم کو کالعدم قرار دے جو ٹرائل کورٹ کو سابق وزیراعظم کے خلاف کارروائی سے روکتا ہے۔

خواجہ حارث نے عدالت کی توجہ دلائی کہ انہوں نے ٹرائل کورٹ کے دائرہ اختیار کو چیلنج کرنے کی درخواست بھی دائر کی ہے۔

دلائل کے بعد اسلام آباد ہائی کورٹ کے چیف جسٹس عامر فاروق نے کیس کی سماعت 14 جون تک ملتوی کر دی۔