وزیراعظم اور چینی صدر کا ترقیاتی کاموں کو  مزید مستحکم کرنے پر اتفاق

🗓️ 6 فروری 2022

بیجنگ (سچ خبریں) چینی صدر نے پاکستان کی ترقیاتی حکمت عملی اور سی پیک کو  مزید مستحکم کرنے پر اتفاق کرتے ہوئے دونوں ممالک کے آپسی تعلقات کو مزید مضبوط بنانے کے عزم کا اظہار کردیا۔ اس موقع پر وزیراعظم عمران خان کا کہنا تھا کہ ہر مشکل گھڑی میں پاکستان چین کے ساتھ کھڑا رہے ۔

ان خیالات کا اظہار چینی صدر شی جن پنگ نے وزیراعظم عمران خان سے ملاقات کے دوران کیا، انہوں نے کہا کہ چین پاکستان کی سالمیت اور خود مختاری کے دفاع میں شانہ بشانہ ہے اور پاکستان کی دہشت گردی کے خلاف جنگ میں حمایت کرتا رہے گا۔

چینی صدر نے وزیراعظم عمران خان سے سی پیک کو مزید مستحکم کرنے پر اتفاق کرتے ہوئے کہا کہ بدلتی دنیا میں چین اور پاکستان کے تعلقات اہمیت کے حامل ہیں۔شی جن پنگ کا کہنا تھا کہ پاکستان کی ترقیاتی حکمت عملی اور سی پیک کو فروغ دینے کیلئے تیار ہیں اور پاک چین عوام کو قریب لانے کیلئے کام کرنے کو تیار ہیں۔

چینی صدر نے کہا کہ چین بین الاقوامی معاملات میں عدل و انصاف کی حمایت کرتا ہے اور یو این جیسے فورمز پر پاکستان کے ساتھ تعاون اور حمایت جاری رکھے گا۔اس موقع پر وزیراعظم عمران خان کا کہنا تھا کہ ہر مشکل گھڑی میں پاکستان چین کے ساتھ کھڑا رہے ۔وزیراعظم عمران خان کا مزید کہنا تھا کہ پاکستان سی پیک کے دوسرے مرحلے کو فروغ دینے کےلیے تیار ہے۔