ن لیگ کی قیادت سے متعلق فواد چوہدری کا اہم بیان

?️ 14 دسمبر 2021

اسلام آباد(سچ خبریں) وفاقی وزیر فواد چوہدری نے لیگی رہنماؤں کے بیانات سے متعلق گفتگو کرتے ہوئے کہا ہے کہ ن لیگ میں اب نئی قیادت سامنے آ جائے گی ۔ شاہد خاقان اور محمد زبیر کے بیانات نے ن لیگ کے اندر کی تقسیم کو واضح کر دیا،پیپلز پارٹی کو بھی زرداری سے آگے نکلنا چاہئے۔

تفصیلات کے مطابق وفاقی وزیر فواد چوہدری نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ شاہد خاقان اور محمد زبیر کے بیانات نے ن لیگ کے اندر کی تقسیم کو مزید واضع کیا ہے، ان خاندانوں نے ملک کی تباہی نکال دی اب کارما دیکھ رہے ہیں۔

انہوں نے مزید کہا کہ ن لیگ میں اب نئی قیادت سامنے آ جائے گی جو اچھی بات ہے ۔پیپلز پارٹی کو بھی زرداری سے آگے نکلنا چاہئے۔یہاں واضح رہے کہ سابق وزیراعظم شاہد خاقان عباسی نے آئندہ انتخابات میں وزیراعظم کے اُمیدوار سے متعلق بتایا تھا کہ مریم نواز وزیراعظم کے عہدے کے لیے اہل نہیں ہیں وہ الیکشن نہیں لڑ سکتیں اور عموماً یہی ہوتا ہے کہ جو پارٹی کا صدر ہوتا ہے وہ وزیراعظم بنتا ہے ،شہباز شریف پارٹی صدر ہیں اور وہی ہمارے آئندہ کے وزیراعظم کے امیدوار ہوں گے۔تاہم محمد زبیر نے مریم نواز سے متعلق شاہد خاقان عباسی کے بیان کی تردید کردی ۔

سابق گورنر سندھ محمد زبیر نے اُن کے بیان کی تردید کرتے ہوئے کہا ہے کہ مریم نواز کے خلاف کرپشن کیس کمزور ہے، ان کا کیس ختم ہوجائے گا اور وہ وزارت عظمیٰ کے لیے اہل ہوں گی۔ نجی ٹی وی اے آر وائی کے پروگرام آف دی ریکارڈ میں گفتگو کرتے ہوئے محمد زبیر نے مزید کہا کہ پی ڈی ایم جب بنی تو بڑی متحرک تھی، اور حکومت کو بھی ٹف ٹائم دیا گیا، پی پی کے نکلنے کے بعد پی ڈی ایم کمزور ہوئی اور حکومت کو موقع مل گیا۔

ان کا مزید کہنا تھا کہ میرا خیال ہے کہ آئندہ سال میں حکومت مزید کمزور جائے گی، پی ٹی آئی حکومت کو کمزور کرنے میں اپوزیشن کا کوئی کردار نہیں ہے، معاشی طور پر صورتحال بدل رہی ہے جو حکومت کو مزید کمزور کرے گی۔