’لندن میں شریف برادران عدلیہ کے خلاف سازش تیار کر رہے ہیں‘

🗓️ 7 مئی 2023

لاہور: (سچ خبریں) پی ٹی آئی  کے صدر اور سابق وزیر اعلیٰ پنجاب چوہدری پرویز الہٰی نے الزام عائد کیا ہے کہ لندن میں شریف برادران عدلیہ کے خلاف سازش تیار کر رہے ہیں، ہم نے کسی کو معاف نہیں کیا، ایسا سسٹم لے کر آئیں گے جس میں اس کا شفاف ٹرائل ہوگا اور ان کو کٹہرے میں لاکر سزائیں دی جائیں گی۔

لاہور میں میڈیا سے گفتگو کرتے ہوئے چوہدری پرویز الہٰی نے کہا ہے کہ شہبازشریف بظاہر تاج پوشی کی تقریب میں شرکت کرنے گیا ہے لیکن وہاں بیٹھ کر شہباز شریف اور نواز شریف عدلیہ کیخلاف سازش تیارکر رہے ہیں، یہ انتقام کی سیاست کرتے ہیں جو پوری زندگی ختم نہیں ہونی، خواجہ آصف خود نہیں بولتا اس کے اندر نواز شریف بولتا ہے، یہ کہتے ہیں انتخابات ہم نے نہیں کرانے کیوں کہ اس کے لیے پیسے نہیں ہیں۔

سابق وزیراعلیٰ پنجاب نے کہا کہ ڈر ہے یہ لوگ یہ نہ کہہ دیں ملک بھی ختم ہوگیا ہے، یہ عدلیہ کے خلاف پلاننگ کے تحت کام کر رہے ہیں لیکن اس بار عدلیہ اور کالا کوٹ ایک نیا انقلاب لے کر آئیں گے اور سپریم کورٹ سے بڑا فیصلہ آئے گا، آئی ایم ایف کے ذریعے کچھ بھی نہیں ہونا، پی ڈی ایم نے گند پھیلا دیا ہے جس کو اب تک صرف اعلیٰ عدلیہ نے سنبھالا ہوا ہے، عدلیہ کو سلام پیش کرتا ہوں، ان کا وقار بلند ہوا ہے، پورا ملک چیف جسٹس کے ساتھ کھڑا ہوگیا ہے، دعا ہے اللہ تعالیٰ چیف جسٹس کو مزید ہمت دے۔

انہوں نے کہا کہ پنجاب کی نگران حکومت کی مدت ختم ہوگئی ہے لیکن یہ اس کے باوجود حکومت کر رہے ہیں، 14 مئی کو انتخابات نہیں ہوئے تو اس کے اثرات مرتب ہوں گے، عمران خان نے قوم کو ایک ایشو پر اکٹھا کر لیا ہے، تحریک انصاف اور ہم پر کیسز بن رہے ہیں، عمران خان کے خلاف 123 کیسز ہو چکے ہیں جب کہ مجھ پر 17 مقدمات قائم کیے گئے ہیں اور انہوں نے جاتے جاتے ایک بڑی ڈکیتی کی، میرے گھر پر حملے کے دوران موبائل اور پیسے بھی لے گئے، عدالتوں میں صرف جھوٹے مقدمات میں ضمانتوں کے کیس چل رہے ہیں۔