قائداعظم کی بصیرت اور عزم ہر نسل کیلئے سبق آموز ہے۔ مریم نواز

?️ 25 دسمبر 2025

لاہور (سچ خبریں) وزیراعلیٰ پنجاب مریم نواز شریف نے کہا ہے کہ قائداعظم کی بصیرت اور عزم ہر نسل کیلئے سبق آموز ہے۔

بانی پاکستان قائداعظم محمد جناح اور صدر مسلم لیگ ن محمد نواز شریف کے یوم پیدائش پر خصوصی پیغام میں وزیراعلیٰ مریم نواز شریف کا کہنا تھا کہ بابائے قوم محمد علی جناح کی عظمت، حکمت ،محنت اور دانائی کو سلام عقیدت پیش کرتی ہوں۔ انہوں نے کہا کہ بانی پاکستان کی بصیرت اور عزم آج بھی ہر دل میں مشعل راہ ہے اور ہر نسل کیلئے سبق آموز ہے، محمد علی جناح وہ عظیم رہنما ہیں جنہوں نے منتشر قوم کو یکجا کر کے انکی تقدیر بدل دی۔

ان کا کہنا تھا کہ نواز شریف کی مدبرانہ قیادت، محنت اور بے پناہ قربانیوں کو بھی خراج تحسین پیش کرتی ہوں، قائداعظم اور نواز شریف وہ عظیم رہنما ہیں جنہوں نے اپنے عزم، بصیرت اور قربانی سے قوم کی تقدیر بدلی، بابائے قوم نے پاکستان بنایا اور محمد نواز شریف نے پاکستان کو سنوارا۔ مریم نواز نے کہا کہ محمد نواز شریف نے ہر بار قوم کو دہشت گردی اور معاشی مشکلات سے نجات دلائی، پاکستان کا دفاع ناقابل تسخیر کرنے کا قائد اعظم کا خواب محمد نواز شریف نے ایٹمی دھماکے کر کے پورا کیا۔

وزیراعلیٰ پنجاب کا کہنا تھا کہ محمد نواز شریف نے لوڈ شیڈنگ کے خاتمے، معاشی ترقی اور خوشحالی کیلئے دن رات لگن سے کام کیا، پنجاب حکومت محمد علی جناح اور محمد نواز شریف کی لیگسی آگے بڑھا رہی ہے، پنجاب حکومت کے ہر فیصلے کا محور محمد علی جناح کی تعلیمات اور محمد نواز شریف کا تجربہ ہے۔ انہوں نے مزید کہا کہ محمد علی جناح نے قوم کو آزادی دی اور محمد نواز شریف نے قوم کو سہولت، امن اور ترقی دی، قائداعظم محمد علی جناح کی تعلیمات اور محمد نواز شریف کی قیادت میں، پاکستان ہمیشہ روشن اور مضبوط رہے گا۔