فواد چوہدری کی مریم نواز اور بلاول پر کڑی تنقید

اسلام آباد(سچ خبریں) میڈیا سے گفتگو کرتے ہوئےوفاقی وزیر برائے اطلاعات فواد چوہدری کا کہنا ہے کہ مریم نواز اور بلاول زرداری سیاسی طور پر طفل مکتب ہیں، ان دونوں کو کشمیر کی تاریخ اور عوام کے جہدوجہد کا کچھ پتا ہی نہیں ہے  فواد چوہدری نے کہا کہ مریم نواز اوربلاول کے والدین پاکستان کی اربوں روپے لوٹنے کے مقدمات میں ملوث ہیں اور مفرور ہیں،ان کی سیاست کا نہ کوئی نظریہ ہے اور نہ ہی کوئی مقصد،ان کی تقریروں سے بھی پتا نہیں چل رہا کہ وہ کہنا کیا چاہ رہے ہیں۔

وفاقی وزیر برائے اطلاعات نے ن لیگ اور پیپلز پارٹی پر طنز کرتے ہوئے کہا کہ 30،30سال حکومت کرنے والوں کو پتا نہیں کہ ان کی پالیسی کیا ہے، جن کا پیسا بیرون ملک ہو ، وہ کیسے پاکستان کے نظریے کی حفاظت کریں گے۔

انہوں نے مزید کہاکہ آزاد کشمیر میں پیپلزپارٹی اور ن لیگ کی 10سال حکومت رہی لیکن کارکردگی صفر رہی،بہتر ہوتا کہ دونوں سیاسی طفل مکتب کے طالب علم جلسوں میں اپنی کارکردگی بتاتے لیکن انہوں نے سیاسی طعنوں کی محفل برپا کردی۔

فواد چوہدری کا مزید کہنا تھا کہ یہ اپنے دور میں کلبھوشن کا نام لیتے ہوئے بھی ڈرتے تھے ، انہیں معلوم ہی نہیں تھا کہ پالیسی کیا چلانی ہے،آ ج مودی کو دوٹوک جواب اسی لیے دیا جارہا ہے کہ یہاں عمران خان کی حکومت ہے،وزیر اعظم نے کشمیر کے مسئلے پر عالمی خاموشی کو توڑا۔