طاہر اشرافی کا 21مئی کو یوم یکجہتیٔ فلسطین منانے کا اعلان

🗓️ 18 مئی 2021

اسلام آباد(سچ خبریں)وزیراعظم کے نمائندہ خصوصی حافظ طاہر اشرفی نے 21مئی کو یوم یکجہتی فلسطین منانے کا اعلان کیا ہے ان کا کا کہنا ہے کہ 21 مئی کوپاکستان میں مظلوم فلسطینیوں کا ساتھ دینے کی لیے یوم یکجہتیٔ فلسطین منایا جائے گا، پاکستان امت مسلمہ کے حوالے سے کردار ادا کرتا رہے گا۔

حافظ طاہر اشرفی نے اپنی پریس کانفرنس کے دوران کہا کہ فلسطینیوں کے ساتھ زیادتی ہو رہی ہے، وزیراعظم کا وژن ہے کہ ہم امت مسلمہ کو متحد کریں، وزیر خارجہ پورے پاکستان کی ترجمانی کریں گے۔انہوں نے مزید کہا کہ اسرائیل مسلسل عورتوں اور بچوں کو نشانہ بنا رہا ہے۔

ان کا کہنا تھا کہ  مسجد اقصٰی پر کوئی سمجھوتا نہیں ہوسکتا، فلسطینی سفیر کے ساتھ آج ملاقات کی ہے۔علامہ حافظ طاہر اشرفی کا کہنا تھا کہ پاکستان مسلم امہ کے حوالے سے کردار ادا کرتا رہے گا، کشمیر اور فلسطین امت مسلمہ کے مسائل ہیں، پاکستان کے سامنے سیز فائر کا مسئلہ پہلے ہے۔حافظ طاہر اشرفی نے کہا ہے کہ شاہ محمود ترکی میں ہیں اور وہاں سے اقوام متحدہ جائیں گے۔

دوسری جانب امیر جماعت اسلامی کراچی حافظ نعیم الرحمان نے فلسطین میں جاری اسرائیلی بربریت کی مذمت کرتے ہوئے کہا ہے کہ اسرائیل اپنے ناپاک ارادوں کو پورا کرنے کیلئے ظلم کرتا ہے۔کراچی میں پریس کانفرنس کرتے ہوئےحافظ نعیم الرحمان نےبتایا کہ اتوار 23 مئی کو شارع فیصل پر فلسطین مارچ ہوگاجس کی قیادت سراج الحق کریں گے۔

انہوں نے تاجروں اور سیاسی و مذہبی جماعتوں سے فلسطین مارچ میں شرکت کی اپیل کرتے ہوئےکہا کہ فلسطین کے لیے پوری امت کو کھڑا ہونا چاہیے۔حافظ نعیم الرحمان نے پریس کانفرنس میں فلسطینیوںپر ہونے والے مظالم کے بارے میں گفتگو کرتے ہوئے کہا کہ مسجد اقصیٰ کی بے حرمتی، بچوں اور خواتین کو شہید کیا گیا، اسرائیل بدمست ہاتھی بنا ہوا ہے،اقوام متحدہ کو اپنا کردار ادا کرنا چاہیے۔