سیکیورٹی فورسز کے عزم اورحوصلے کو خراج تحسین پیش کرتا ہوں: وزیر داخلہ

?️ 3 فروری 2022

اسلام آباد (سچ خبریں)وفاقی وزیر داخلہ شیخ رشیدنے سیکیورٹی فورسز کے عزم و حوصلے کو خراج تحسین پیش کرتے ہوئے کہا ہے کہ بلوچستان حملوں میں 15 امن دشمن مارے گئے جبکہ پاک فوج کے چار جوانوں نے جام شہادت نوش کیا،سیکیورٹی فورسزکسی بھی دہشت گردی کےمقابلےکی بھرپور صلاحیت رکھتی ہیں۔

تفصیلات کے مطابق وفاقی وزیر داخلہ شیخ رشید نے پنجگوراورنوشکی میں سیکیورٹی فورسزکے کیمپوں پردہشت گرد حملوں کی مذمت کرتے ہوئے سیکیورٹی فورسز کو دہشت گردوں کے حملے پسپا کرنے پر خراج تحسین کیا۔وزیر داخلہ نے بتایا دہشت گردوں نے پنجگور اور نوشکی میں رات گئے بڑا حملہ کیا، جسے ہماری عظیم افواج نے ناکام بنادیا، ، نوشکی میں نو اور پنجگور میں چھ امن دشمن مارے گئے جبکہ فائرنگ کے تبادلے میں پاک فوج کے چار جوانوں نے جام شہادت نوش کیا۔

شیخ رشید کا کہنا تھا کہ سیکیورٹی فورسزکسی بھی دہشت گردی کےمقابلےکی بھرپور صلاحیت رکھتی ہیں، سیکیورٹی فورسز کے عزم اورحوصلے کو خراج تحسین پیش کرتا ہوں، سیکیورٹی فورسز دہشتگردوں کو کسی صورت کامیاب نہیں ہونے دے سکتیں۔

دوسری جانب وزیرمملکت فرخ حبیب نے پنجگوراورنوشکئی میں دہشت گردوں کے حملے کی مذمت کرتے ہوئے کہا سکیورٹی فورسزکےبروقت جواب نےدہشت گردوں کےناپاک عزائم ناکام بنادیئے، دہشت گردوں کی بزدلانہ کارروائیاں ایسے ہی ناکام بناتے رہیں گے۔فرخ حبیب کا کہنا تھا کہ مسلح افواج اورسیکیورٹی فورسزمکمل طورپرالرٹ ہیں، قوم جانوں کا نذرانہ پیش کرنےوالوں کوسلام پیش کررہی ہے، شہید پاک فوج کےجوان کےبلنددرجات کےلئےدعاگوہیں۔