سپریم کورٹ نے تجوری ہائٹس کو گرانے کا حکم دے دیا

?️ 12 نومبر 2021

کراچی (سچ خبریں) سپریم کورٹ نے اہم فیصلہ کرتے ہوئے کراچی کے علاقے گلشن اقبال میں تجوری ہائٹس کو چار ہفتے میں گرانے کا حکم دے دیا اس سلسلے میں تحریری فیصلہ بھی آ چکا ہےعدالتی فیصلے میں بکنگ کروانے والوں کو تین ماہ میں معاوضہ ادا کرنے کی ہدایت کردی۔

تفصیلات کے مطابق سپریم کورٹ کراچی رجسٹری نے تیجوری ہائٹس کیس کا تحریری حکم نامہ جاری کردیا ،تحریری فیصلہ چیف جسٹس گلزار احمد نے لکھا، جس میں کہا گیا ہے کہ 4 ہفتوں میں پوری عمارت گرائی اور ملبہ اٹھایاجائے، 4 ہفتوں کا وقت 29اکتوبرسےشروع ہوگا۔

تحریری فیصلہ میں کہا ہے کہ انہدام سے قبل تیجوری ہائٹس انتظامیہ فائلیں اورسامان نکال لے،بکنگ فائلیں کمشنرکراچی کی زیرنگرانی نکالی جائیں، کمشنرکراچی بکنگ فائلوں کی مکمل انونٹری بنائیں۔

واضح رہے کہ عدالتی فیصلے میں کہا گیا ہے کہ انونٹری میں بکنگ کروانے والوں  کے مکمل پتے ،حساب درج کیے جائیں، انونٹری مکمل کر کے کمشنر کراچی رپورٹ سپریم کورٹ میں جمع کرائیں اور بکنگ کروانے والوں کو3 ماہ میں معاوضہ ادا کیاجائے۔

خیال رہے کہ تحریری فیصلے کے مطابق تیجوری ہائٹس اس فیصلےپرعمل درآمدیقینی بنائے، عمل درآمد نہ کرنے پر تیجوری ہائٹس انتظامیہ کیخلاف کارروائی ہوگی، عمارت کے انہدام اور ملبہ اٹھانے کی نگرانی کمشنر کراچی خود کریں۔