دہشتگردی کی بزدلانہ کاروائی کی شدید الفاظ میں مذمت کرتا ہوں: وزیراعظم

🗓️ 26 اپریل 2022

اسلام آباد (سچ خبریں) وزیراعظم شہبازشریف نے کہا ہے کہ دھماکے میں ملوث عناصر کو کیفرکردار تک پہنچایا جائے گا، دہشتگردی کی بزدلانہ کاروائی کی شدید الفاظ میں مذمت کرتا ہوں، چینی دوستوں سمیت قیمتی جانوں کے ضیاع پر انتہائی دکھی ہوں۔

انہوں نے ٹویٹر پر کراچی نیورسٹی دھماکے پر اپنے مذمتی بیان میں دھماکے میں چینی باشندوں سمیت قیمتی جانوں کے ضیاع پر انتہائی دکھ اور افسوس کا اظہار کیا۔

وزیراعظم شہبازشریف نے کہا کہ غمزدہ خاندانوں کے دکھ میں برابر کا شریک ہوں اور میری تمام ہمدردی سوگوار خاندانوں کے ساتھ ہے، دہشتگردی کی بزدلانہ کاروائی کی شدید الفاظ میں مذمت کرتا ہوں۔ انہوں نے کہا کہ دہشتگردحملے میں ملوث مجرموں کو انصاف کے کٹہرے میں لایا جائے گا۔

وزیراعظم شہبازشریف نے وزیراعلیٰ سندھ مراد علی شاہ کو فون کیا اور دھماکے سے متعلق رپورٹ طلب کی۔

وزیرداخلہ رانا ثناءاللہ کا کہنا ہے کہ جامعہ کراچی وین دھماکے کی شدید مذمت کرتا ہوں، قیمتی جانوں کے ضیاع پر دکھ ہے۔ انتہائی افسوسناک واقعہ ہے؛ اسکے پیچھے مذموم مقاصد ہیں۔ چیف سیکرٹری اور آئی جی سندھ سے دھماکے کی رپورٹ طلب کر لی ہے، صوبائی حکومتوں سے مل کرغیر ملکیوں کی حفاظت ہر صورت یقینی بنائیں گے۔ کراچی پولیس چیف غلام نبی میمن نے میڈیا سے گفتگو کرتے ہوئے کہا کہ ایک وین میں دھماکا ہوا، وین میں کراچی یونیورسٹی کے ٹیچرز موجود تھے، دھماکے کی نوعیت کا تعین کیا جارہا ہے، دھماکے میں 4 لوگ جاں بحق ہوئے اور 4 زخمی ہوئے ہیں، زخمیوں میں رینجرز اہلکار اور سکیورٹی گارڈ بھی شامل ہے، زخمیوں کو ہسپتال منتقل کردیا گیا ہے جبکہ ڈیڈ باڈیز کو چھیپا سردخانے پہنچا دیا گیا ہے۔

چار ہلاکتوں میں ایک پاکستانی جاں بحق ہوا جبکہ 3 غیرملکی تھے۔ امکان ہے دھماکہ خود کش تھا لیکن کچھ بھی کہنا قبل ازوقت ہے، دھماکا خاتون خود کش بمبار نے کیا ہے یہ کہنا قبل ازوقت ہے۔ دھماکا کس نوعیت کا تھا اس حوالے سے شواہد اکٹھے کیے جا رہے ہیں۔ ہماری کوشش ہے کہ سکیورٹی کا بہترین بندوبست کیا جائے۔ اے آروائی کے مطابق پولیس حکام کا کہنا ہے کہ دھماکا آئی ای ڈی کا تھا، 3 سے 4 کلو مواد استعمال ہوا، فوٹیجز میں دھماکے کے وقت برقع پوش خاتون کو دیکھا گیا گاڑی پر بال بیئرنگ کے نشانات موجو دہیں۔ عینی شاہد کا کہنا ہے کہ ایک خاتون عبایا میں گاڑی کے پاس کھڑی تھی کہ اچانک دھماکا ہوگیا۔