خیبرپختونخوا(سچ خبریں)خیبرپختونخوا میں سینیٹ انتخابات نشست پر دوبارہ گنتی کے لئے ریٹرننگ آفیسرنے سینیٹ انتخابات سے متعلق رپورٹ الیکشن کمیشن میں جمع کرادی ہے ، موقف سننے کے بعد درخواست پر سماعت 6 اپریل کے لیے ملتوی کر دی گئی ہے۔
تفصیلات کے مطابق الیکشن کمیشن میں خیبرپختونخوا میں سینیٹ انتخابات نشست پر دوبارہ گنتی کی درخواست کی سماعت ہوئی تو درخواست گزار تاج آفریدی کے وکیل وسیم سجاد الیکشن کمیشن میں پیش ہوئے۔وکیل وسیم سجاد نے کہا کہ سینیٹ الیکشن میں ووٹوں کی دوبارہ گنتی کی درخواست منظور نہیں کی گئی۔
ان کا کہنا تھا کہ پریزائیڈنگ افسر نے ہماری درخواست قبول نہیں کی، سینیٹ انتخابات کے نتائج کسی بھی وقت چیلنج کیے جاسکتے ہیں۔وکیل وسیم سجاد نے کہا کہ قومی اسمبلی میں سینیٹ انتخابات کے نتائج کی دوبارہ گنتی کی گئی خیبرپختونخوا میں سینیٹ انتخابات کے ووٹ ہمیں نہیں دکھائے گئے۔
ریٹرننگ آفیسرنے سینیٹ انتخابات سے متعلق رپورٹ الیکشن کمیشن میں جمع کراتے ہوئے کہا کہ ہم نے فریقین کی موجودگی میں ووٹوں کی گنتی کی، ووٹوں کی گنتی کے بعد تاج آفریدی نے رات گئے درخواست دی ہم نے ووٹوں کی گنتی کی درخواست مسترد نہیں کی، ان کو قانونی راستہ بتایا۔
ممبر الیکشن کمیشن الطاف ابراہیم قریشی نے کہا کہ فریقین کو مطمئن کرنے کیلئے سماعت کررہے ہیں۔ موقف سننے کے بعد درخواست پر سماعت 6 اپریل کے لیے ملتوی کر دی گئی۔تاج آفریدی نے خیبرپختونخوا سے ذیشان خانزادہ کی کامیابی کو چیلنج کیا ہے۔