لاہور(سچ خبریں)قبلہ اؤل مسجد اقصیٰ میں اسرائیلی فورسز کی قتل و غارت گری کیخلاف امیر جماعت اسلامی سراج الحق کی ہدایت پر جماعت اسلامی لاہور نے یکجہتی فلسطین مارچ کا اہتمام کیا۔ فلسطین مارچ کی قیادت امیر جماعت اسلامی لاہور میاں ذکر اللہ مجاہد، سیکرٹری جماعت اسلامی لاہور انجینئر اخلاق احمد نے کی۔
مارچ میں امیر جماعت اسلامی وسطی پنجاب محمد جاوید قصوری، نائب امراء چودھری محمود الاحد، ملک شاہد اسلم، خالد احمد بٹ، ڈاکٹر محمود احمد، عبدالعزیز، سیف الرحمن، مرزا شعیب یعقوب سمیت سینکڑوں کی تعداد میں شہریوں نے شرکت کی اور فلسطینی بھائیوں کیساتھ اظہار یکجہتی کیا۔
مارچ میں قائدین اور شہریوں نے حکومتِ پاکستان سے فلسطینی مسلمانوں کی ہر طرح سے مدد کا مطالبہ کیا۔ امیر جماعت اسلامی لاہور ڈاکٹر ذکراللہ مجاہد کا کہنا تھا کہ فلسطین میں اسرائیلی فورسز کا مسجد اقصیٰ پر حملہ کھلی دہشتگردی ہے، قبلہ اول کی عزت و حرمت کی حفاظت ہر مسلمان کا فریضہ ہے، مسجد اقصیٰ مسلمانوں کا قبلہ اول اور خانہ کعبہ اور مسجد نبوی کے بعد تیسرا مقدس ترین مقام ہے۔ میاں ذکر اللہ مجاہد نے کہا کہ قبلہ اول کے مقام سے ہی آپ سرکارﷺ نے معراج کے سفر کا آغاز کیا، مسجد اقصیٰ حقیقت میں مسلمانوں کی میراث ہے، جو تاریخی اور مذہبی حقائق سے ثابت ہے، اسرائیل ایک ناجائز ریاست ہے، جس نے مسجد اقصیٰ پر غاصبانہ قبضہ کر رکھا ہے۔
انہوں نے کہا کہ اسرائیلی فورسز نے فجر کے وقت مسجد اقصیٰ میں نہتے ہزاروں نمازیوں پر حملہ کرکے درندگی کا ثبوت دیا ہے۔ انہوں نے کہا کہ فجر کے وقت مسجد اقصیٰ میں نہتے نمازیوں پر آنسو گیس شیلنگ کے ذریعے ظلم کے پہاڑ توڑے گئے، اسرائیلی فورسز کے حملے میں 100 سے زائد نمازی زخمی اور کچھ افراد زخموں کی تاب نہ لاتے ہوئے شہید ہوئے، امریکہ مظلوم فلسطینیوں کا ساتھ دینے کی بجائے ظالم اسرائیل کا ساتھ دے کر ظلم کی ایک داستان رقم کر رہا ہے، عالمی برادری اور انسانی حقوق کی تنظیمیں مسجد اقصیٰ اور کشمیر کی آزادی میں اپنا کردار ادا کرنے کی بجائے مجرمانہ طور پر آنکھیں بند کیے ہوئے ہیں۔ میاں ذکر اللہ مجاہد نے کہا کہ موجودہ اور سابقہ حکمران قوم کو اسلام کا نام لیکر اور آزادی کا بیانیہ دیکر قوم کو بیوقوف بنا رہے ہیں، مسلم لیگ، پپیلز پارٹی اور پی ٹی آئی کے کسی حکمران نے ابھی تک فلسطین میں گذشتہ 20 دن سے جاری ظلم و بربریت کیخلاف ایک لفظ نہیں بولا، جس کی شدید الفاظ میں مذمت کرتے ہیں۔
انہوں نے کہا کہ اقتدار سے نکالے جانے پر جلسوں میں خان صاحب کا امریکہ کیخلاف کھڑے ہونے کا بیانہ جھوٹ اور فریب کے سوا کچھ نہیں، اگر عمران خان واقعی امریکہ کیخلاف ڈٹ کر کھڑا ہوتا تو قبلہ اول کی آزادی پر اسرائیل اور امریکہ کیخلاف اپنے جلسوں میں قوم کا آگاہ کرتا اور مذمت کرتا، امریکہ اس وقت یہودیوں اور اسرائیلوں کی بھرپور سرپرستی کر رہا ہے، جبکہ کپتان نے امریکہ کیخلاف اپنی زبان کو بڑا تالا لگا رکھا ہے۔ انہوں نے کہا کہ حکومت پاکستان سمیت مسلم ممالک کے حکمرانوں سے مطالبہ کرتے ہیں کہ وہ فلسطینی اور کشمیری مسلمانوں کی آزادی میں اپنا کردار ادا کریں۔ جماعت اسلامی فلسطین، کشمیر سمیت دنیا بھر میں مسلمانوں پر کسی بھی قسم کے ظلم کیخلاف اپنی آواز بلند کرتی رہے گی۔ جماعت اسلامی فلسطین کی آزادی تک مالی اور سفارتی مدد جاری رکھے گی۔
