بزدار کی باجوڑ بم دھماکے کی شدید مذمت

?️ 13 نومبر 2021

لاہور (سچ خبریں) وزیر اعلیٰ پنجاب عثمان بزدار  نے باجوڑ میں ریموٹ کنٹرول کے ذریعے کئے گئے بم دھماکوں کی شدید الفاظ میں مذمت کی ہے۔ بم دھماکے  کے نتیجہ میں دو پولیس اہلکار شہید ہو گئے سیکیورٹی فورسز نے  علاقے کو گھیرے میں  لے کر سرچ آپریشن شروع کر دیا گیا ہے۔

تفصیلات کے مطابق عثمان بزدار  نے دھماکے میں شہید پولیس اہلکاروں کی قربانی کو خراجِ عقیدت پیش کیا۔اُنہوں نے کہا شہداء کی لازوال قربانیوں کو سلام پیش کرتے ہیں، پوری پاکستانی قوم دہشت گردوں کے خلاف متحد ہے۔واضح رہے کہ باجوڑ میں راغگان ڈیم  کے قریب ریموٹ کنٹرول بم دھماکے میں 2 پولیس اہلکار شہید ہوئے، علاقے کو گھیرے میں لے کر سرچ آپریشن شروع کر دیا گیا ہے۔

خیال رہے کہ تحصیل خار  کے علاقہ راغگان ڈیم کے قریب ریموٹ کنٹرول بم دھماکے میں سیکیورٹی پر مامور 2 پولیس اہلکاروں کی شہادت کے بعد ان  کی لاشیں اسپتال منتقل کردی گئی ہیں۔ ڈی پی او عبد الصمد خان کے مطابق واقعہ کی تحقیقات شروع کردی ہیں جبکہ علاقے کو گھیرے میں لے کر سرچ آپریشن کیا جارہا ہےجلد ہی ملزمان کو گرفتار کرلیا جائے گا۔

ابتدائی پولیس رپورٹ کے مطابق دھماکا پولیس موبائل کے قریب ہوا، دھماکے موٹر سائیکل مکمل طور پر تباہ ہوگئی جبکہ قریبی دوکانوں اور گھروں کے شیشے بھی ٹوٹ گئے۔ پولیس ذرائع کا کہنا ہے کہ واقعے کے پیش نظر بم ڈسپوزل اسکواڈ کو طلب کرلیا گیا ہے، علاقے میں آمدورفت کو مکمل طور پر سیل کرتے ہوئے آپریشن کا آغاز کردیا گیا ہے۔